سەرجەم ئەو حاجییانەی لەڕێگەی وەزارەتی ئەوقافەوە چوونەتە حەج سەلامەتن

ئاڤا نیوز

بە گوتەی سەرۆکی تیمی تەندروستیی هەرێمی کوردستان لە سعودیە، "سەرجەم ئەو حاجییانە سەلامەتن کە لەڕێگەی وەزارەتی ئەوقافی هەرێمی كوردستانەوە چوونە بۆ حەج".

وێنە گەورەکە: لەگەڵ حاجییان ئەمساڵ، وەزارەتی تەندروستی تیمێکی 21 کەسی لە پزیشك و کارمەندی تەندروستی ناردووە بۆ چاودێری تەندروستی حاجییان.

لێدوانی فەرمی: د.دیار ئیبراهیم، سەرۆکی تیمی تەندروستیی هەرێمی کوردستان لە سعودیە بە ئاڤا نیوزی ڕاگەیاند: هەموو ئەو حاجییانەی بە پلانی وەزارەتی ئەوقاف هاتوون، تا ئێستا سەلامەتن و لەماوەی ئەو دوو ڕۆژە هیچ حاجییەک تەنانەت نەنێردراوە بۆ نەخۆشخانەش، ئەوەی هەیە تەنیا ماندووبوون و لەگەڵ بوونی هەندێک حاڵەتی هەڵامەت بووە.

ئەوەی پێویستە بیزانیت: ئەمڕۆ بەڕێوەبەرایەتی حەج و عومرەی هەرێمی کوردستان ڕایگەیاند، تا درەنگانی شەوی یەکەمی جەژنی قوربان، حەوت حاجی گیانیان لەدەستداوە، هەموویان ئەوانە بوون کە بە ڤیزەی یەک ساڵە چوونەتە حەج.

باکگراوند: ئەمساڵ بەپێی پلانی بەڕێوەبەرایەتی حەج و عومرەی هەرێمی کوردستان، چوار هەزار و 685 کەس چوونەتە سعودیە بۆ بەجێهێنانی فەریزەی حەج، بەڵام مەزەندە دەکرێت بە هەزاران کەسی دیکە بە ڤیزای یەک ساڵە گەشتیان کردبێت.