زیاتر لە 117 هەزار گەشتیار سەردانی پارێزگای هەولێریان کردووە

ئاڤا نیوز

 

لە جەژنی قورباندا 47 هەزار گەشتیار زیاتر بەراورد بە ڕۆژانی جەژنی ڕەمەزان هاتوونەتە هەولێر.

 

وێنە گەورەکە: لە ڕۆژانی جەژنی قورباندا زیاتر لە 117 هەزار گەشتیار لە دەروازەکانی هەولێر هاتوونەتە هەرێمی کوردستان و سەردانی ناوچە گەشتیارییەکانی سنووری پارێزگاکە و ئیدارەی سەربەخۆی سۆرانیان کردووە.

 

لێدوانی فەرمی: نەریمان فازڵ، بەڕێوەبەری ڕاگەیاندنی گەشتوگوزاری هەولێر بە ئاڤا نیوزی گوت، "دوو ڕۆژ بەر لە دەستپێکردنی جەژن گەشتیاران هاتوونەتە پارێزگای هەولێر، بەشێکی زۆری ئەو گەشتیارانە سەنتەری پارێزگاکەیان وەک شوێنی حەوانەوە بەکارهێناوە".

 

ژمارەکان وادەڵێن: لە ماوەی سێ ڕۆژی جەژنی ڕەمەزان 69 هەزار و 499 گەشتیار سەردانی هەولێری پایتەختیان کردووە، لە جەژنی قوربان ژمارەکە بۆ 117 هەزار و 421 گەشتیار بەرزبووەتەوە.