بەرهەمی کارەبای نیشتمانی 250 مێگاوات زیاد دەبێت

 ئاڤا دیجیتاڵ

لەڕێگەی پشتبەستن بە وزەی پاک، بەرهەمی کارەبای نیشتیمانی لە هەرێمی کوردستان 250 مێگاوات زیاد دەبێت.

 
بۆچی گرنگه‌: لەگەڵ زیادبوونی مێگاواتی کارەبا لە مانگی چواری ئەمساڵ، ڕاستەوخۆ کاتژمێرەکانی پێدانی کارەبای نیشتیمانی لە سەرتاسەری هەرێمی کوردستان زیاد دەبێت.

لێدوانی فه‌رمی: ئومێد ئەحمەد، گوتەبێژی وەزارەتی كارەبا بە ئاڤا نیوزی گوت: لە مانگی چواری ئەمساڵ 250 مێگاوات كارەبا، لە وێستگەی كۆمباین سایكڵی بازیان زیاد دەبێت، كە وزەیەكە پێویستی بە سووتەمەنی نییە".

ئەوەی پێویستە بیزانیت: كاتژمێرەكانی پێدانی كارەبای نیشتمانی بۆ ناوچە گەرمەكان هەشت بۆ نۆ كاتژمێرە، بۆ ناوچە ساردەكانیش حەوت بۆ هەشت كاتژمێرە، بەپێی بارودۆخی بەرهەم و خواست، پێدانی كارەبا زیاد و كەم دەكات و ناجێگیرە.


ژماره‌كان وا ده‌ڵێن: ژمارەی هاوبەشانی كارەبا و ژمارەی بەستنی پێوەری زیرەك بەمشێوەیە:

ـ ژمارەی هاوبەشانی كارەبا: یه‌ك ملیۆن و 809 هه‌زار و 280  هاوبەش.


ـ ژمارەی ئەوانەی پێوەری زیرەكیان بەستووە: یه‌ك ملیۆن و 350 هه‌زار و 791. هاوبه‌ش


ـ ڕێژەی سەدی بەستنی پێوەری زیرەک: 74.7%.
 
ئەمەش بزانە: وێستگەكانی بەرهەمهێنانی کارەبا لە هەرێمی كوردستان 15 وێستگەن و توانای بەرهەمهێنانیان حەوت هەزار و 439 مێگاواتە، ئێستا وێستگەکان تەنها (46.8%)ی تواناكەیان بەكاردەهێنن و ، بەرهەمەکەشیان سێ هەزار 487 مێگاواتە.