ئەمریکا بۆ حیزبوڵڵا: ناتوانین بەر بە هێرشی ئیسرائیل بگرین

ئاڤا نیوز

بەرپرسانی ئەمریکا هۆشداریان داوە لەوەی ئەگەر حیزبوڵڵا لە هێرشەکانی بەردەوام بێت و گرژییەکان زیاتر هەڵبکشێن، ئەوا ناتوانن ڕێگە لە هێرشی ئیسرائیل بۆ سەر لوبنان بگرن. 

ئەوەی پێویستە بیزانیت: لە میانەی سەردانەکەیدا بۆ بەیرووت، ئامۆس هۆخشتاین، نێردەی سەرۆکی ئەمریکا، بە بەرپرسانی لوبنانی گوتووە "حیزبوڵڵا هەڵەیە ئەگەر پێی وا بێت ئەمریکا دەتوانێت بەر بە هێرشی ئیسرائیل بۆ سەر لوبنان بگرێت ئەگەر ئەوان بەردەوام بن لە هێرشەکانیان".

زانیاریی زیاتر: چەند سەرچاوەیەکی ئەمریکی ئاشکرایان کردووە، لە ماوەی چەند هەفتەی داهاتوودا هێرشی ئیسرائیل بۆ سەر باشووری لوبنان دەستپێدەکات و لەو کاتەشدا ئەمریکا یارمەتی ئیسرائیل دەدات تا بەرگریی لە خۆی بکات.

وێنە گەورەکە: ئیدارەی بایدن لە هەوڵی ئەوەدایە ئاگربەست لە غەززە بێتە ئاراوە و ڕێگە لە فراوانبوونی شەڕەکە بگرێت؛ بەڵام زیادبوونی گرژییەکانی نێوان ئیسرائیل و حیزبوڵا ئەم هەوڵانە بێئەنجام دەکات.