وەزیری بەرگریی تورکیا لە هەولێرە و لەگەڵ بەرپرسانی باڵای کورد کۆدەبێتەوە

ئاڤا دیجیتاڵ

 

دوای ئەنجامدانی کۆمەڵێک کۆبوونەوە لە شاری بەغدا، یەشار گولەر، وەزیری بەرگریی تورکیا گەیشتە هەولێر و لەلایەن شۆڕش ئیسماعیل، وەزیری پێشمەرگەی هەرێمی کوردستان پێشوازی لێکرا.

 

زانیاریی تایبەت: یەشار گولەر سبەی چوارشەممە لەگەڵ بەرپرسانی باڵای هەرێمی کوردستان کۆدەبێتەوە و پەیوەندییەکانی نێوان هەردوولا و دۆسیەی ئەمنی نێوانیان تەوەری سەرەکیی کۆبوونەوەکانیان دەبێت.

 

بۆچی گرنگە: سەردانی وەزیری بەرگریی تورکیا بۆ عێراق و هەرێمی کوردستان، کە وڵاتێکی بەهێزە و ئەندامی ناتۆیە، لەم گرژی و ئاڵۆزییانەی کە ڕۆژهەڵاتی ناوەڕاست بەگشتی و عێراق بەتایبەتی پێیدا تێدەپەڕن، چاوەڕێ دەکرێت ئەنجامەکانی کاریگەربن.

 

باکگراوند: تورکیا و هەرێمی کوردستان هەمیشە پەیوەندییەکانیان بە "دۆستانە" ناودەبەن؛ لە بوارەکانی سیاسی، ئابووری و ئەمنی هەماهەنگی لەنێوانیاندا هەیە، کۆتایی مانگی ڕابردووش ئیبراهیم کاڵن، سەرۆکی دەزگای هەواڵگریی تورکیا (میت) سەردانی هەولێری کرد و لەگەڵ سەرۆک بارزانی کۆبووەوە. بەپێی ڕاگەیێنراوی کۆبوونەوەکە، "جەخت لەسەر پەیوەندییەکانی نێوان هەرێمی کوردستان و تورکیا و هەماهەنگییەکان بۆ پاراستنی ئارامی و سەقامگیری کراوەتەوە."