عالیە نوسەیف جیابوونەوەی خۆی لە دەوڵەتی یاسا ڕاگەیاند

ئاڤا نیوز  

عالیە نوسەیف، پەرلەمانتاری دەوڵەتی یاسا لە پەرلەمانی عێراق وازهێنانی خۆی لە فراکسیۆنەکەی ڕاگەیاند و هۆکارەکەشی بۆ جیاوازی لە ڕاو بۆچوون گەڕاندووەتەوە.

وێنە گەورەکە: عالیە نوسەیف، یەکێک بووە لەو پەرلەمانتاری ئیئتیلافی دەوڵەتی یاسا بە سەرۆکایەتی نووری مالیکی، هەمیشە لە لێدوانەکاندیدا دژ بە کورد و بەرژەوەندییەکانی هەرێمی کوردستان قسەی کردووە.

پەیامی فەرمی: عالیە نوسەیف، پەرلەمانتاری پێشووی دەوڵەتی یاسا لە پەرلەمانی عێراق لە پەڕەی فەرمی خۆی لە تۆڕی "X"  نووسیوتی: "جێهێشتنی خۆم لە فراکسیۆنی دەوڵەتی یاسا ڕادەگەیەنم بەهۆی جیاوازی دیدگا سیاسییەکان بۆ قۆناغی داهاتوو و بەهۆی ئەو جیاوازییەی کە لە نێوان ئەندامانی دەوڵەتی یاسادا هەیە، بە دیاریکراوی لە نێوان سەربەخۆکان و ئەوانەی سەر ئینتیمای حزبییان هەیە".

زانیاریی زیاتر: بە گوتەی نوسەیف " ئەم دیدگایە لەناو زۆربەی ئەندامانی سەربەخۆدا هەیە، لە ڕۆژانی داهاتووشدا ئەو هەڵاواردن و چینایەتییە ئاشکرا دەکەم کە ڕوودەدات".