10 ملیار دینار بۆ ژماره‌یه‌ک پڕۆژه‌ی خزمه‌تگوزاری له‌ هه‌ڵه‌بجه‌ خه‌رج ده‌کرێت

ئاڤا نیوز

له‌سه‌ر بودجه‌ی وه‌به‌رهێنانی وه‌زاره‌تی شاره‌وانی و گه‌شتوگوزار، ڕه‌زامه‌ندی له‌سه‌ر خه‌رجکردنی زیاتر له‌ 10ملیار دینار بۆ جێبه‌جێکردنی ژماره‌یه‌ک پڕۆژه‌ی خزمه‌تگوزاری له‌ پارێزگا‌ی هه‌ڵه‌بجه درا.

وێنە گەورەکە: ڕۆژی 22-02-2024 سەرۆکوەزیران بارزانی، سه‌ردانی پارێزگای هەڵەبجەی کرد و بڕیاری دا‌ ژماره‌یه‌ک پڕۆژه‌ی گرنگیی خزمه‌تگوزاری له‌ شاره‌که‌ جێبه‌جێ بکرێت، ماسته‌رپلانی هه‌ڵه‌بجه‌ گوژمه‌ی بۆ ته‌رخان کرا و ئێستا له‌ قۆناغی جێبه‌جێکردندایه‌.

لێدوانی فەرمی: ساسان عەونی، وەزیری شارەوانی و گەشتوگوزاری هەرێمی کوردستان ڕایگەیاند: "بڕیاری بڕی شەش ملیار و 660 ملیۆن دینار‌ له‌سه‌ر بودجه‌ی وه‌به‌رهێنانی وه‌زاره‌تی شاره‌وانی بۆ جێبه‌جێکردنی پڕۆژه‌ی خزمه‌تگوزاری له‌ پارێزگای هه‌ڵه‌بجه دراوە‌. بڕی زیاتر له‌ سێ ملیار و 392 ملیۆن دیناریش ‌ له‌سه‌ر بودجه‌ی ئاسایی سه‌رۆکایه‌تیی شاره‌وانیی هه‌ڵه‌بجه‌ به‌شێوه‌ی نه‌ختینه‌ و به‌ قۆناغ ڕه‌زامه‌ندی له‌سه‌ر دراوه‌".

زانیاریی زیاتر: بڕی 557 ملیۆن دینار‌ له‌لایه‌ن نووسینگه‌ی سه‌رۆکوه‌زیرانه‌وه‌ دراوەته‌ سه‌رۆکی شاره‌وانیی هه‌ڵه‌بجه‌، بۆ جێبه‌جێکردنی دوو پڕۆژه‌ی خزمه‌تگوزاری که‌ ڕاسته‌وخۆ ئه‌و‌ له‌لایه‌ن شاره‌وانیی هه‌ڵه‌بجه‌وه‌ جێبه‌جێ ده‌کرێن.