بڕیارێکی نوێ لە کۆمیسیۆنەوە بۆ دەنگدەران

ئاڤا  نیوز

 

ئەو دەنگدەرانەی کێشەی خوێندنەوەی پەنجەمۆریان هەیە دەتوانن سەردانی بنکەکانی دەنگدان بکەن و دووبارە پڕۆسەی تۆمارکردنی پەنجەمۆریان بکەنەوە، بۆ ئەوەی لە دەنگدانی خولی شەشەمی پەرلەمانی کوردستان بێبەش نەبن.

 

وێنە گەورەکە: دوای سێ مانگ لە وەستانی جارێکی دیکە ناوەندەکانی دەنگدان لە سەرجەم پارێزگاکانی هەرێمی کوردستان، پڕۆسەی دووبارە تۆمارکردنی پەنجەمۆر دەستیپێدەکەنەوە، لە ماوەی ڕابردوو کێشەی 20 هەزار دەنگدەر چارەسەر بووە، بەشێکی زۆریان ماون کە چارەسەر نەبوون.

 

بۆچی گرنگە: زیاتر لە 355 هەزار دەنگدەر لە هەرێمی کوردستان کێشەی خوێندنەوەی پەنجەمۆریان هەیە، بە دەستپێکردنەوەی پڕۆسەکە، کێشەی بەشێکی دیکەی دەنگدەران چارەسەر دەبێت.

 

لێدوانی فەرمی: مەڕوان محەممەد، بەڕێوەبەری ئۆفیسی هەولێری کۆمیسیۆنی هەڵبژاردنەکانی عێراق بە ئاڤا نیوزی گوت، "لە سبەی دووشەممە 01-07-2024 پڕۆسەی تۆمارکردنی ئەو دەنگەرانە دەستپێدەکات کە کێشەی خوێندنەوەی پەنجەمۆریان هەیە و ماوەی 10 ڕۆژ بەردەوام دەبێت".

 

ژمارەکان وادەڵێن: 355 هەزار و 506 دەنگدەر لە هەرێمی کوردستان کێشەی نەبوونی پەنجەمۆریان هەیە، کە بەمشێوەیە بەسەر پارێزگاکان دابەشبوون:

- پارێزگای هەولێر: 136 هەزار دەنگدەر 
- پارێزگای سلێمانی: 143 هەزار و 506 دەنگدەر 
- پارێزگای دهۆک: 76 هەزار دەنگدەر