نزیکەی 200 هەزار مامۆستا و فەرمانبەر زەوی وەردەگرن

ئاڤا نیوز

 

وەزیری شارەوانیی هەرێمی کوردستان ڕایدەگەیێنێت، سەرۆکایەتییە شارەوانییەکان ئەو شوێنانەیان دەستنیشانکردووە کە وەک زەوی بە مامۆستایان و فەرمانبەران دەدرێن.

 

وێنە گەورەکە: دوای 18 ساڵ پڕۆسەی دابەشکردنی زەوی دەستی پێکردووەتەوە، نزیکەی 200 هەزار کەس دەگرێتەوە و لە سنووری جوگرافی کارکردنیان زەوییان پێدەدرێت.

 

لێدوانی فەرمی: ساسان عەونی، وەزیری شارەوانی بە ئاڤا نیوزی گوت، "ئەو فۆڕمەی لەلایەن وەزارەتی شارەوانی ئامادەکرابوو، سەرۆکایەتیی دیوان لە ئەنجوومەنی وەزیران گشتاندنی بۆ هەموو وەزارەت، فەرمانگە و دەستەکان بۆ کردووە، ئەو فەرمانبەرانەی لەو بڕیارە سوودمەند دەبن، دەتوانن فۆڕمی وەزارەتی شارەوانی پڕبکەنەوە، دوای بەرزکردنەوەی بۆ ئەنجوومەنی وەزیران بڕیاری تەرخانکردنی بۆ دەردەچێت".

 

ئەوەی پێویستە بیزانیت: بەپێی دوایین ئامار لە هەرێمی کوردستان 697 هەزار و 190 فەرمانبەری هەمیشەیی و 31 هەزار و 698 فەرمانبەری گرێبەست هەیە، 30%ـی ئەو ڕێژەیە لە وەرگرتنی زەوی سوودمەند دەبن.