ئەمریکا: خۆشحاڵین بە کەمبوونەوەی بەرچاوی پێشێلکارییەکانی ئازادیی ڕاگەیاندن لە هەرێمی کوردستان

ئاڤا دیجیتاڵ

 

کۆنسوڵخانەی ئەمریکا لە هەولێر ڕاگەیێنراوێکی بڵاوکردووەتەوە و دەڵێت، "ئەمریکا خۆشحاڵە بە کەمبوونەوەی بەرچاوی پێشێلکارییەکانی ئازادیی ڕاگەیاندن."

 

چیرۆکی سەرەکی: لە چوارچێوەی سەردانیکردنی ستافی کۆنسوڵخانەی گشتیی ئەمریکا لە هەولێر بۆ نووسینگەی دوو دەزگای میدیایی دەرەکی، باسی ئازادی ڕادەربڕین و ژینگەی کاری ڕاگەیاندن لە هەرێمی کوردستان کرا. 

 

بۆچی گرنگە: کەمبوونەوەی پێشێلکارییەکانی ئازادیی ڕاگەیاندن، دەبێتە هۆی ڕەخساندنی ژینگەیەکی لەبار بۆ کاری ڕاگەیاندن و بە یەکێک "لە گرنگترین پێوەرەکانی دیموکراسیش" دادەنرێت.

 

ڕاگەیێنراوی فەرمی: کۆنسوڵخانەی ئەمریکا لە هەولێر لە ڕاگەیێنراوێکدا ڕایگەیاند: "ویلایەتە یەکگرتووەکانی ئەمریکا خۆشحاڵە بە کەمبوونەوەی بەرچاوی پێشێلکاریەکانی ئازادیی ڕاگەیاندن و پشتیوانی لە ژینگەیەک دەکات تێیدا ڕۆژنامەوانان بتوانن بە ئازادانە کاری خۆیان بکەن بەبەبێ ترس لە چاوترساندن، هەراسانکردن و جیکاری لەسەر بنەمای ئینتیمای حزبی".

 

لێدوانە فەرمییەکان: 

•کاروان ئەنوەر، سکرتێری لقی سلێمانی سەندیکای ڕۆژنامەنووسانی کوردستان، بۆ ئاڤا نیوز ڕایگەیاند: بەراورد بە دوو ساڵی ڕابردوو پێشێلکارییەکان بەرامبەر بە ڕۆژنامەنووسان و ڕاگەیەندکاران بەڕێژەیەکی بەرچاو کەمی کردووە.

 

•نامیق هەورامی، گوتەبێژی وەزارەتی ڕۆشنبیری و لاوان بۆ ئاڤا نیوز گوتی: وەک وەزارەتی ڕۆشنبیری هەمیشە هەوڵمانداوە لە دابینکردنی زەمینەیەکی باش و سەلامەت بۆ ڕاگەیەندکار و میدیا بەگشتی و هەمیشە پێداگیری لە مافەکانیان دەکەین و دڵخۆشین بەو بەرەوپێشچوونەی لە بوارەکەدا بەدی دەکرێت.

 

باکگراوند: ساڵی 2022 ڕۆژنامەنووسان ڕووبەڕووی 431 پێشێلکاریی بوونەتەوە، بەراورد بە ساڵی 2023 بەڕێژەی 42% کەمی کردووە کە 249 پێشێلکاریی بووە. ساڵی 2022 ڕۆژنامەنووسان 64 جار دەستگیرکرابوون و بەراورد بە ساڵی 2023 بەڕێژەی 42% کەمی کردووە کە لەو ساڵەدا 37  ڕۆژنامەنووسان دەستگیرکراون.