وەزارەتی دارایی: لەگەڵ بەغدا هاوڕابووین بۆ جێبەجێکردنی سیاسەتی گومرگی

ئاڤا نیوز

 

لە دووەم کۆبوونەوەی شاندی هەرێمی کوردستان و عێراق لەسەر پرسی گومرگ و خاڵە سنوورییەکان، هەردوولا لەسەر چەند پرسێک هاوڕابوونە.

 

وێنە گەورەکە: یەکێک لەو کێشانەی لە نێوان هەرێمی کوردستان و بەغدا هەیە پرسی ئیدارەدانی گومرگ و خاڵە سنوورییەکانە، لیژنەیەکی باڵا لەنێوان هەردوولا پێکهاتووە.

 

ڕاگەیێنراوی فەرمی: بەگوێرەی ڕاگەیێنراوی وەزارەتی دارایی هەرێمی کوردستان لە کۆبوونەوەکەی ئەمڕۆ دووشەممە، هەردوولا هاوڕابوون کە یەک سیاسەتی گومرگی لەسەر ئاستی عێراق و هەرێمی کوردستان جێبەجێ بکرێت و هەماهەنگی زیاتر بکرێت بۆ پاراستی بەرهەمی ناوخۆ و جێبەجێکردنی ڕۆژنامەی کشتوکاڵی.

 

لەلایەکی دیکەوە: ساماڵ عەبدولڕەحمان، بەڕێوەبەری گشتیی دەروازە سنوورییەکانی هەرێمی کوردستان کە یەکێک بوو لە بەشداربووان، دوای کۆبوونەوەکە بە ئاڤا نیوزی گوت: نەگەیشتوونەتە ڕێککەوتن و ئەمڕۆ شاندەکە دەگەڕێتەوە، بەڵام کۆبوونەوەکانمان بەردەوام دەبن.

 

ئەوەی لەوباریەوە دەگوترێت: بەگوێرەی زانیارییەکان، حکومەتی عێراق داوای جێبەجێکردنی یاسای ژمارە 30 ساڵی 2016ـی گومرگی و دەروازە سنووریەکان دەکات کە بەهۆیەوە حکومەتی عێراق دەسەڵاتی تەواوی بەسەر ئیدارەدانی گومرگەکان و دەروازە سنوورییەکان دەبێت، بەڵام هەرێمی کوردستان داوای هەمواری ئەو یاسایە دەکات.