بۆ مووچەی مانگی هەشت حكومەتی كوردستان پەیوەندیی بە بەغداوە دەكات

ئاڤا نیوز

حکومەتی هەرێمی ئەمڕۆ تەرازووی پێداچوونەوەی مانگی هەشتی بۆ بەغدا ناردووە و سبەی سێشەممەش 120 ملیار داهاتی هەرێمی کوردستان دەنێردرێت بۆ بەغدا، سەرۆكی دیوانی سەرۆكایەتیی ئەنجوومەنی وەزیرانیش دەڵێ بۆ بابەتی مووچەی مانگی هەشت پەیوەندیمان بە بەغداوە كردووە.

لێدوانی فەرمی: ئۆمێد سەباح، سەرۆکی دیوانی ئەنجوومەنی وەزیران، بە ئاڤا میدیای ڕاگەیاند، سبەی 120 ملیار داهاتی مانگی هەشت بۆ بەغدا دەنێردرێت، قسەم لەگەڵ وەزارەتی دارایی عێراق کردووە، لەم یەک دوو ڕۆژە پارەی مووچەی فەرمانبەرانی هەرێمی کوردستان دەنێردرێت، هاوکات هەر ئەمڕۆ تەرازووی پێداچوونەی مانگی هەشتمان بۆ بەغدا نارد.

زانیاریی زیاتر: ئۆمێد سەباح، ڕاشیگەیاند: سەبارەت بە بودجەی ساڵی 2026 شاندێکی حکومەتی هەرێمی کوردستان سەردانی بەغدا دەکەین و هەوڵ دەدەین ڕێگرییەکانی بەردەم مووچەی فەرمانبەرانی هەرێمی کوردستان لە بودجەی 2026 لابدرێت و مامەڵەیەکی یەکسان لەگەڵ هەرێمی کوردستان بکرێت، کۆمیتەیەک پێکهاتووە بۆ ئەوەی ڕەشنووسێک ئامادە بکەین لە کۆبوونەوەکان بیخەینە ڕوو.