سوودانی: داهاتی نانەوتی کاریگەری لەسەر مووچەی خەڵکی کوردستان نابێت

ئاڤا نیوز

سەرۆکوەزیرانی عێراق ڕایگەیاند، لەگەڵ حکومەتی هەرێمی کوردستان دۆسیەی نەوتییان چارەسەرکردووە و ئێستا گفتوگۆ لەسەر داهاتی نانەوتی دەکەن، گفتوگۆکانیش لەسەر داهاتی نانەوتی کاریگەریی لەسەر بەردەوامی ناردنی مووچەی فەرمانبەرانی کورستان نابێت.

وێنە گەورەکە: ناردنی مووچەی مانگی هەشتی فەرمانبەرانی هەرێمی کوردستان تاوەکو ئێستا بڕیاری لەبارەوە نەدراوە، سبەی سێشەممە کۆبوونەوەی ئەنجوومەنی وەزیرانی عێراق ئەنجام دەدرێت و چاوەڕوان دەکرێت سوودانی فرمانی خەرجکردنی مووچە بۆ تەیف سامی وەزیری، وەزیری دارایی عێراق دەربکات. 

لێدوانی فەرمی: محەممەد شیاع سوودانی، سەرۆکوەزیرانی عێراق لە کۆبوونەوەیدا لەگەڵ ژمارەیەک ڕۆژنامەنووسی عەرەب و بیانی لە بەغدا ئاماژەی بەوەشكرد، دۆسیەی نەوتییان لەگەڵ هەرێمی کوردستان چارەسەرکرد کە لە ساڵی 2009ەوە بە هەڵپەسێردراوی مابووەوە، لەئێستاشدا هەولێر و بەغدا دانوستان لەسەر داهاتی نانەوتی دەکەن کە کاریگەریی لەسەر بەردەوامی ناردنی مووچەی فەرمانبەرانی کورستان نابێت.

وتیشی، دامەزراندنی نێردەی ترەمپ بۆ عێراق هەنگاوێکی گرنگە، بەتایبەتیش کە نێردەکەی ترەمپ ( مارک ساڤایا) بە ڕەچەڵەک عێراقییە و هیوای سەرکەوتنی لە ئەرکەکەیدا بۆ دەخوازن.

سەرۆکوەزیرانی عێراق لەبارەی باڵیۆزخانەی عێراق و سووریاش لە بەغدا و دیمەشق وتی، باڵیۆزخانەی هەردوو وڵات لە کارەکانیان بەردەوامن، حکومەتی هەردوو وڵاتیش لەبوارەکانی ئەمنی، ڕووبەڕووبوونەوەی داعش و ماددە هۆشبەرەکان هەماهەنگییان هەیە.