وەزارەتی دارایی و ئابووری داهاتی نانەوتی بۆ بەغدا نارد

ئاڤا نیوز

وەزارەتی دارایی و ئابووری هەرێمی کوردستان 120 ملیار داهاتی نانەوتی بە کاش بۆ لقی هەولێری بانکی ناوەندیی عێراق ڕەوانە کرد.

چیرۆکی سەرەکی: نووسراوی ناردنی 120 ملیارەکە ڕۆژی 20-10-2025 لەلایەن ئاوات شێخ جەناب، وەزیری دارایی و ئابووریی کوردستان واژۆ کراوە و ئەمڕۆش پارەکە خراوەتە سەر هەژماری لقی هەولێری بانکی ناوەندی لە هەولێر. داهاتی نانەوتی مانگی هەشت بەمشێوەیە کۆکراوەتەوە؛ 72 ملیار دیناری لە هەولێر و دهۆک، 48 ملیار دیناریش لە سلێمانی بووە.

ڕاگەیێنراوی فەرمی: وەزارەتی دارایی و ئابووری هەرێمی کوردستان ڕایگەیاند: 120 ملیار داهاتی نانەوتی بۆ مانگی هەشت بەشێوەی کاش خرایە سەر هەژماری لقی هەولێری بانکی ناوەندی عێراق.

لەلایەکی دیکەوە: حکومەتی عێراق ڕۆژی دووشەممە دەستی بە دابەشکردنی مووچەی فەرمانبەرانی خۆی کرد، ئەمڕۆ سێشەممەش کۆبوونەوەی ئەنجوومەنی وەزیرانی عێراق بەڕێوەدەچێت و چاوەڕوان دەکرێت سوودانی فەرمانی خەرجکردنی مووچەی مانگی هەشتی فەرمانبەرانی هەرێمی کوردستان ئاڕاستەی وەزارەتی دارایی عێراق بکات.