ساڵی ڕابردوو زیاتر لە هەزار حاڵەتی شێرپەنجەی مەمک لە هەرێمی کوردستان تۆمار کراوە

ئاڤا نیوز

بەگوێرەی ئامارێک لە ساڵی 2024 دا نۆ هەزار و 43 حاڵەتی تووشبوون بە شێرپەنجەی مەمک لە عێراق تۆمار کراوە، لەو ژمارەیەش هەزار و 465 لە هەرێمی کوردستان بووە.

وێنە گەورەکە: بەمەبەستی ڕووبەڕووبوونەوەی شێرپەنجەی مەمک، لە هەرێمی کوردستان جیا لە سەنتەرەکانی دەستنیشان کردن و چارەسەرکردنی نەخۆشیەکە، بەردەوام کار لەسەر هۆشیارکردنەوەی هاونیشتمانیان لەو نەخۆشیەکە دەکرێت، چونکە شێرپەنجەی مەمک ئەگەر لە قۆناغی سەرەتا دەستنیشان بکرێت چارەسەر کردن و چاکبوونەوەی نەخۆشەکە ئاسانتر دەبێت.

زانیاریی بەدەستهاتوو: بەپێی ئامارەکانی وەزارەتی تەندروستی عێراق، ساڵی ڕابردوو نۆ هەزار و 43 حاڵەتی تووشبوون بە شێرپەنجەی مەمک لە عێراق تۆمار کراوە، لەو ژمارەیەش هەزار و 465 لە هەرێمی کوردستان بووە، هاوکات 697 توشبووی باشوور و ناوەڕاستی عێراق لە هەرێمی کوردستان نەخۆشییەکەیان دەستنیشان کراوە و چارەسەرییان بۆ کراوە.

ئەوەی پێویستە بیزانیت: بەرپرسانی تەندرووستی هەرێمی کوردستان دووپاتی دەکەنەوە، هۆکاری تۆمارکردنی ئەم نەخۆشانەی شێرپەنجە لە هەرێمی کوردستان بۆ باشی خزمەتگوزارییەکان و زوو تۆمارکردنیان و کارئاسانییەکان لە چارەسەرکردنیان دەگەڕێتەوە.

چارەسەرکان: لە هەرێمی کوردستان چوار سەنتەری چارەسەر کردنی شێرپەنجەی مەمک هەن:

-    کلینکی نەخۆشییەکانی مەمک لە نەخۆشخانەی شار لە شاری سلێمانی

-    کلینکی نەخۆشییەکانی مەمک لە شاری دهۆک

-    سەنتەری نەخۆشییەکانی مەمک لە نەخۆشخانەی نازدار بامەڕنی لە هەولێر

-    کلینکی نەخۆشییەکانی مەمک لە نەخۆشخانەی ڕزگاری لە شاری هەولێر

زانیاریی زیاتر: لە کابینەی نۆیەمی حکومەتی هەرێمی کوردستان کلینکی نەخۆشییەکانی مەمک لە نەخۆشخانەی ڕزگاری لە شاری هەولێر کرایەوە و ئامێر و پێداویستییەکانی بۆ دابین کراوە، هاوکات هۆڵی نەشتەرگەری هەیە بۆ هەر نەخۆشێک کە پێویستی بە نەشتەرگەری هەبێت، تاقیگەیەکیش هەیە بۆ پشکنینی ئەو نمونانەی وەردەگیرێن.

لە لایەکی دیکەوە: ئامێریكی پشکنینی مەمۆگرافی تایبەت بە پشکنین و دەستنیشانکردنی شێرپەنجەی مەمک بۆ ئیدارەی سەربەخۆی ڕاپەڕین دابین کراوە.

خاڵە ئەرێنییەکان: لە سەرجەم سەنتەری نەخۆشییەکانی مەمک، پزیشکی پسپۆری نەشتەرگەری، تیشک و سۆنەر، نەخۆشییەکانی مەمک هەیە.

بە تەنیشت ئەم بابەتەوە: لە هەولێر پسپۆڕی جوانکاری هەیە، تایبەت بەو کەسانەی بەهۆی شێرپەنجەوە مەمکی دەبڕێتەوە، دەتوانرێت نەشتەرگەری جوانکارییان بۆ بکرێت.

ئەمەش بزانە: بەپێی ئامارەکانی وەزارەتی تەندروستی، ڕێژەی تووشبوون بە شێرپەنجە لە هەرێمی کوردستان لە خوار ستانداردەکانە و 0.15%ـیە.

باکگراوند: لە لێدوانێکی پێشووی د.سامان بەرزنجی، وەزیری تەندروستی ڕایگەیاند: 98% بۆ 99%ـی چارەسەری شێرپەنجە لە نەخۆشخانە حکومییەکان دەکرێت، لەبەرئەوەی چارەسەری شێرپەنجە تێچووی زۆرە و لە نەخۆشخانە ئەهلییەکان ئەو چارەسەرییانە ناکرێن، بەشی زۆری ئەو نەخۆشانەی لە هەرێمی کوردستانیش چارەسەر وەردەگرن خەڵکی باشوور و ناوەڕاستی عێراقن، بەشێکیشیان ئاوارە و پەنابەرن.