بەغدا بۆ واشنتن: چاو بە بڕیاری سزادانی بانکە عێراقییەکان بخشێنەوە

ئاڤا دیجیتاڵ

 

وەزیری دەرەوەی عێراق بە تەلەفۆن قسەی لەگەڵ وەزیری دەرەوەی ئەمریکا کردووە و داوای چاوخشاندنەوەی بە بڕیاری سزادانی بانکە عێراقییەکان کردووە. 

 

ڕاگەیێنراوی فەرمی: فوئاد حوسێن، وەزیری دەرەوەی عێراق لەگەڵ ئەنتۆنی بلینکن، وەزیری دەرەوەی ئەمریکا قسەی کردووە و سەرکۆنەی هێرشەکانی ئەمدواییەی ئەمریکای بۆ سەر عێراق کردووە، داواشی کردووە: "عێراق نەکرێتە گۆڕەپانی یەکلاییکردنەوەی ململانێی وڵاتان".

 

زانیاریی زیاتر: وەزارەتی گەنجینەی ئەمریکا، سزای بەسەر حەوت بانکی عێراقیدا سەپاندووە و پێشتریش 14 بانکی دیکەی سزاداوە. لەو پەیوەندییە تەلەفۆنییەدا، فوئاد حوسێن داوای ڕوونکردنەوەی لە هۆکاری سزادانی ئەو بانکانە کردووە. چونکە عێراق نازانێت سزاکان بەهۆی پابەندبوونیانە بە ڕێنماییە بانکییەکان یان هۆکاری سیاسییە. 

 

وەزیری دەرەوەی عێراق داوای کردووە، وەزارەتی گەنجینەی ئەمریکا چاو بە بڕیاری سزادانی ئەو بانکانە عیراقییانە بخشێنێتەوە و سزاکانیان لەسەر لاببات.