سەرۆک بارزانی و وەزیری بەرگریی تورکیا جەخت لە دەستەبەرکردنی سەقامگیری دەکەنەوە

ئاڤا دیجیتاڵ

 

سەرۆک مەسعود بارزانی پێشوازی لە وەزیری بەرگریی تورکیا کرد، لە دیدارەکەدا یەشار گولەر سڵاوی سەرۆکی تورکیای بە سەرۆک  بارزانی گەیاند. 

 

 چیرۆکی سەرەکی: لە چوارچێوەی سەردانیکردنی بۆ عێراق و هەرێمی کوردستان، ڕۆژی چوارشەممە 7ی شوباتی 2024 لە سەڵاحەددین سەرۆک مەسعود بارزانی پێشوازی لە یەشار گولەر، وەزیری بەرگریی توركیا و شاندێكی یاوەری كرد كە پێكهاتبوو لە مەتین گوراک سوپاسالاری توركیا و عەلی ڕەزا گونەی، باڵیۆزی توركیا لە عێراق و ژمارەیەک بەرپرسی سیاسی و سەربازیی توركیا.

 

ڕاگەیێنراوی فەرمی: لە دیدارەكەدا بیروڕا لەبارەی بارودۆخی سیاسیی ناوچەكە و دوایین پێشهاتەكانی ڕۆژهەڵاتی ناوەڕاست و هەڕەشەكانی تیرۆر و هەروەها پەیوەندییەكانی نێوان عێراق و هەرێمی كوردستان و وڵاتی توركیا ئاڵوگۆڕ كرا.

 

زانیاریی زیاتر: هەر لەو دیدارەدا جەخت لە هەماهەنگیی نێوان توركیا و عێراق و هەرێمی كوردستان كرایەوە، ئەویش لەپێناو دەستەبەركردنی سەقامگیری و بووژانەوە و كاری هاوبەشی نێوانیان.

 

لەلایەکی دیکەوە: وەزارەتی بەرگریی تورکیا ڕاگەیێنراوێکی لەبارەی کۆبوونەوەکە بڵاوکردەوە و ڕایگەیاند، لە دیدارەکەدا بیروڕا لەبارەی پرسی بەرگری و ئاسایشی ناوچەکە ئاڵوگۆڕ کرا، یەشار گولەر سڵاوی سەرۆک ڕەجەب تەیب ئەردۆغانی بە سەرۆک بارزانی گەیاند.

 

ئەمەش بزانە: پەیوەندییەكانی نێوان هەرێمی كوردستان و توركیا و پێشڤەچوونی ئەو پەیوەندییانە تەوەری دیکەی ئەو كۆبوونەوەیە بوون.