پەرلەمانتارێک: مووچەی مانگەکانی پێنج و شەشی هێزە ئەمنییەکان پێکەوە خەرج دەکرێت

ئاڤا نیوز

 

ئەندامێکی کورد لە لیژنەی دارایی پەرلەمانی عێراق دەڵێت، وردبینی لە لیستی مووچەی مانگەکانی پێنج و شەشی پێشمەرگە و هێزە ئەمنییەکان بەردەامە و ئەگەر هەفتەی داهاتوو تەواوبێت پێکەوە خەرج دەکرێت.

 

وێنە گەورەکە: هێشتا وەزارەتی دارایی عێراق مووچەی مانگی پێنجی پێشمەرگە و هێزە ئەمنییەکانی خەرج نەکردووە، لەلایەن حکومەتی هەرێمی کوردستانیش هەوڵێکی زۆر دراوە کێشەکە بەیەکجاری چارەسەر بکرێت.

 

لێدوانی فەرمی: د. خەلیلی دۆسکی، ئەندامی لیژنەی دارایی بە ئاڤا نیوزی گوت:  "بەردەوام لەگەڵ بەڕێوەبەری گشتیی ژمێریاری وەزارەتی دارایی عێراق لە پەیوەندیدام، خۆی پێیگوتم وردبینی تەواونەکراوە، ڕەنگە هەفتەی داهاتوو تەواو بکرێ و مووچەی دوو مانگ پێکەوە بنێرین، ئەمە بەدڵنیایی ڕێی تێدەچێت".

 

ئەوەی پێویستە بیزانیت: لیستی ناوی مووچەخۆرانی پێشمەرگە و هێزە ئەمنییەکان بۆ مانگی پێنج بە کۆد نێردراوە، بەڵام بۆ مانگی شەش بەپێی داواکاریی بەغدا بەشی زۆریان بە ناوی چواری و بەشێکی کەمیان  بە کۆد نێردراوە. 

 

باکگراوند: ئەمڕۆ وەزارەتی دارایی عێراق ڕەزامەندی لەسەر خەرجکردنی گوژمەیەک پارە بۆ مووچەی مانگی شەشی  فەرمانبەران خەرج کرد و بڕیارە سبەی پارەکە بخرێتە سەر هەژماری هەرێمی  کوردستان لیستی مووجە ڕابگەیێنرێت.