پەرلەمانتارێکی عێراق: سزای سەر بانکە عێراقییەکان سیاسین

ئاڤا دیجیتاڵ

دوای سزاکانی ئەمریکا بۆسەر بانکەکان، حکومەتی عێراق داوای لابردنیان دەکات و پەرلەمانتارێکیش پێیوایە، هۆکارەکەی سیاسییە. 

 

وێنە گەورەکە: وەزارەتی گەنجینەی ئەمریکا ژمارەیەک بانکی عێراقی سزاداوە؛ حکومەتی عێراق داوا دەکات چاو بەو سزایانە بخشێنرێنەوە، چونکە پێیوایە بەلابردنی ئەو سزایانە، سەقامگیری لە بازاڕی دراوی عێراقیدا دروستدەبێت. 

 

بۆچی گرنگە؟ سزاکانی ئەمریکا بۆ سەر ئەو بانکە عێراقییانە، کاریگەریی نەرێنی لەسەر دۆخی ئابووریی عێراق هەیە و حکومەتیش هەوڵدەدات کۆنترۆڵی بەرزبوونی نرخی دۆلار بکات. ئەگەرهاتوو چاودێری وردیی بانکەکان بکرێت و هیچ پێشێلکارییەکی نوێ تۆمار نەکرێت، ئەمریکا متمانەی زیاتری بە بانکەکان دەبێت و بەمەش، سزاکانی سەر ئەو بانکانە سووک دەبن.

 

لێدوانی فەرمی: "هەندێک لە دامەزراوە داراییەکان کە سزایان بەسەردا سەپێنراوە، پارە سپی دەکەنەوە. هەندێک بانک هەن، کاری خۆیان بە ڕێکوپێکی ناکەن، بەڵام سزاکانی ئەمریکا سیاسین نەک پێشێلکردنی ڕێنماییەکان" یاسر حوسێنی، جێگری سەرۆکی لیژنەی ئابووری، پیشەسازی و بازرگانی لە پەرلەمانی عێراق وای گوت.

 

باکگراوند: وەزارەتی گەنجینەی ئەمریکا، سزای بەسەر حەوت بانکی عێراقیدا سەپاندووە و پێشتریش 14 بانکی دیکەی سزاداوە؛ ڕۆژی دووشەممە فوئاد حوسێن، وەزیری دەرەوەی عێراق بە تەلەفۆن قسەی لەگەڵ ئەنتۆنی بلینکن، وەزیری دەرەوەی ئەمریکا کرد و داوای لابردنیانی کرد.