دۆخی شنگال یەکێکە لە تەوەرەکانی گفتوگۆی سەرۆک بارزانی لەگەڵ لایەنەکانی عێراق

ئاڤا نیوز

دوای شەش ساڵ، سەرۆک بارزانی سەردانی بەغدا دەکاتەوە و گفتوگۆی زۆر بابەتی سیاسی، ئەمنی و ئابووری دەکات. چارەسەرکردنی پرسی شنگالیش بەشێکە لە تەوەرەکان.

وێنە گەورەکە: دوای 10 ساڵ هێشتا مەینەتیی کوردانی ئێزدی بەردەوامە، ئەمەش بەهۆی مانەوەیان لە ئاوارەییدا، ئاوەداننەکردنەوە و بوونی هێزی چەکداری لە یاسا دەرچوو و نەبوونی خزمەتگوزاری لە ناوچەکانیان.

لێدوانی فەرمی: ڕۆژی سێشەممە (٢-٧-٢٠٢٤) سەرۆکوەزیران بارزانی لە گوتارێکدا گوتی: "بەهۆی خۆسەپێنیی میلیشیا و گرووپە چەکدارە نایاساییەکانەوە، هێشتا دۆخی شنگال ئاسایی نەبووەتەوە، خوشک و برا ئێزدییەکانمان نەیانتوانیوە بگەڕێنەوە ناوچەکانیان، پێویستە ڕێككەوتننامەی شنگال وەك خۆی جێبەجێ بكرێت و دەسەڵات بگەڕێتەوە دەستی خەڵکی ڕەسەنی شنگال".

لەلایەکی دیکەوە: ئەنجوومەنی پارێزگای نەینەوا، کەسێکی سەر بە حەشدی شەعبی و نزیک لە پەکەکەی کردە قایمقامی شنگال. لەو بارەیەوە  ئەحمەد کیکی، سەرۆکی فراکسیۆنی پارتی لە ئەنجوومەنی پارێزگای نەینەوا بە ئاڤا نیوزی گوت: "دانانی قایمقامەکە نایاساییە و فراکسیۆنەکەیان کارەکانیان هەڵدەپەسێرێت".

ئەوەی ئێستا ڕوودەدات: شنگال بە دۆخێکی خراپی ئەمنی و بێ خزمەتگوزاری و کارگێڕییەکی سەپێنراودا تێدەپەڕێت. سەرۆک بارزانی لە بەغدا بە ئامانجی تێپەڕاندنی ئەو دۆخە و جێبەجێکردنی ڕێککەوتننامەی شنگال لەگەڵ حکومەت و لایەنە سیاسییەکانی عێراق گفتوگۆ دەکات.

گۆشەیەکی دیکە: حکومەتی هەرێمی کوردستان و عێراق لە ساڵی 2020، ڕێککەوتنیان کرد بۆ ئەوەی دۆخی شنگال ئاسایی بکەنەوە، لە بوارەکانی ئەمنی، کارگێڕی، دەرکردنی هێزە چەکدارە نایاساییەکان و ئاوەدانکردنەوە و گەڕاندنەوەی ئاوارەکان، بەڵام حکومەتی عێراق پابەند نەبووە بە ڕێککەوتنەکە.