ئەنجوومەنی وەزیران بۆ وەزارەتەکان: لە 10 ڕۆژی یەکەمی هەموو مانگێک لیستی مووچە ئامادە بکەن

ئاڤا نیوز

 

بابەتی هاوتاکردنی مووچەی خانەنشینان و پرسی مووچەی فەرمانبەران و دوایین بڕیارەکان لەبارەی پڕۆژەی "هەژماری من" ناوەرۆکی کۆبونەوەی ئەمڕۆی ئەنجوومەنی وەزیران بووە.

 

وێنە گەورەکە: ئەمڕۆ چوارشەممە ئەنجوومەنی وەزیران بە سەرپەرشتیی سەرۆکوەزیران بارزانی کۆبوونەوەی هەفتانەی خۆی ئەنجامدا و سێ پرس تاوتوێ کرد.

 

ڕاگەیێنراوی فەرمی: سەرۆکوەزیران بارزانی لە کۆبوونەوەکەی ئەمڕۆی ئەنجوومەنی وەزیران، وەزارەتی دارایی ڕاسپاردووە لە 10 ڕۆژی یەکەمی هەموو مانگێکدا، لیستی مووچە ئامادە بکەن بۆ ئەوەی بیانوو بۆ دواکەوتنی مووچە نەمێنێت.

 

قووڵتر: لە کۆبوونەوەکە ئەوەش باسکراوە، بەپێی یاسای ساڵی 2014 سەرجەم مووچەخۆران خانەنشین دەکرێن و یەک دامەزراوەش بە ناوی دەستەی خانەنشینی نیشتیمانی، تایبەتمەند دەبێت بە خانەنشینی لە سەرجەم بوارەکانی وەزیفەی گشتیی شارستانی، سەربازیی، پێشمەرگایەتی و هێزەکانی ئاسایشی ناوخۆ کە ئێستا بە گوێرەی یاسای ساڵی 2006 هەر یەک لەم پۆستانە یاسای خانەنشینی تایبەت بە خۆیان هەیە.

 

ئەوەی پێویستە بیزانیت: لە هەرێمی کوردستان ژمارەی خانەنشینان 277 هەزار و 541 کەسن، خەرجیی کۆی مووچەی مانگانەی ئێستایان 122 ملیار دینارە.

 

لەلایەکی دیکەوە: لە کۆبوونەوەکەدا، پرۆسەی بەبانکیکردنی مووچەی مووچەخۆرانی هەرێمی کوردستان باسکراوە، سەرۆکوەزیران بارزانی ڕایگەیاندووە: هەموو ئەو بانکانەی لە هەرێمی کوردستان بەشدارن لە پرۆسەی بەبانکیکردنی مووچەی فەرمانبەران لەلایەن دادگەی فیدڕاڵی ڕێگەپێدراون.