ڕاوێژکارێکی سوودانی: پێگەی سەرۆک بارزانی لە بەغدا دەرگا بەڕووی چارەسەری کێشەکان دەکاتەوە

ئاڤا نیوز

 

ڕاوێژکارێکی سەرۆکوەزیرانی عێراق ئاماژە بە گرنگی پێگەی سەرۆک بارزانی لە یەکلاکردنەوە و چارەسەرکردنی زۆرێک لە پرسەکانی لەنێوان لایەنە سیاسییەکانی عێراق و هاوکات کێشە چارەسەرنەکراوەکانی هەولێر و بەغدا دەکاتەوە.

 

وێنە گەورەکە: دوای شەش ساڵ، ئەمڕۆ چوارشەممە 3-7-2024 سەرۆک بارزانی سەردانی بەغدای کرد و بڕیارە زنجیرەیەک کۆبوونەوەی لەگەڵ سەرکردە سیاسییەکان و بەرپرسانی باڵای عێراق هەبێت.

 

لێدوانی فەرمی: عائد هیلالی، ڕاوێژکاری سەرۆکوەزیرانی عێراق بە ئاڤا نیوزی ڕاگەیاند: سەردانەکەی سەرۆک بارزانی بۆ بەغدا لەم کاتەدا زۆر گرنگە بۆ چارەسەرکردنی کێشە هەڵپەسێردراوەکانی نێوان هەولێر و بەغدا، ئەم سەردانەش گرنگییەکی زۆری هەیە بۆ نزیککردنەوەی بۆچوونەکان لەسەر زۆرێک لە بابەتە جێناکۆکەکان لەنێوان لایەنە سیاسییەکانی عێراق.

 

قووڵتر: ئەو ڕاوێژکارە پێیوایە، بارزانی چەندین چارەسەری پێیە بۆ قەیرانەکان، سەرۆکوەزیرانی عێراق و حکومەتەکەی نیازێکی ڕاستەقینەیان هەیە بۆ چارەسەرکردنی کێشە هەڵپەسێردراوەکان لەگەڵ هەرێمی کوردستان، بەتایبەت لە پرسی دارایی و نەوت.