سەرۆک بارزانی بۆ باڵیۆزی ئەمریکا: نیازپاکی بۆ چارەسەرکردنی کێشەکان لەگەڵ بەغدا هەیە

ئاڤا نیوز

 

سەرۆک بارزانی لە بەغدا پێشوازی لە باڵیۆزی ئەمەریکا لە عێراق کرد و پرسی پەیوەندییەکانی نێوان هەولێر و بەغدا، مانەوەی هێزەکانی ئەمریکا و هەڵبژاردنی پەرلەمانی کوردستان تاوتوێ کران.

 

وێنە گەورەکە: دوای شەش ساڵ ئەمڕۆ سەرۆک بارزانی بۆ سەردانێکی دوو ڕۆژی گەیشتە بەغدا و لەگەڵ 20 بەرپرسی عێراق و باڵیۆزی وڵاتان کۆبوونەوە و دیداری دەبێت.

 

ڕاگەیێنراوی فەرمی: بارەگای بارزانی بڵاویکردەوە، سەرۆک بارزانی لە کۆبوونەوەی لەگەڵ ئەلینا ڕۆمانۆوسکی، باڵیۆزی ئەمریکا تیشکی خستە سەر هۆکارەکانی سەردانەکەی بۆ بەغدا و ئاماژەی بەوەدا کە دوای ئەوەی هەست بەوە کرا نیازپاکی هەیە لە چارەسەرکردنی گرفتەکان و پابەندبوون بە دەستوور و دروستبوونی کەشێکی ئەرێنی، سەردانی بەغدای کردووە.

 

زانیاریی زیاتر: پەیوەست بە مانەوەی هێزی هاوپەیمانان سەرۆک بارزانی ڕایگەیاند، ئەمە پرسێکی نیشتیمانییە و پەیوەست نییە بە لایەنێک و دەبێت سەقامگیریی و بەرژەوەندییەکانی عێراق لەبەرچاو بگیرێت.

 

لەلایەکی دیکەوە: باڵیۆزی ئەمەریکا لە عێراق پشتیوانیی وڵاتەکەی بۆ سەردانەکەی سەرۆک بارزانی و باشتربوونی پەیوەندییەکانی هەرێمی کوردستان و بەغدا ڕاگەیاند و جەختی کردەوە هانی هەردوو حکومەت دەدەن بۆ بەرەوپێشبردنی پەیوەندییەکانیان و بەردەوامی و بەهێزکردنی دیالۆگی نێوانیان. 

 

گۆشەیەکی دیکە: سەبارەت بە هەڵبژاردنی پەرلەمانی هەرێمی کوردستانیش باڵیۆزی ئەمەریکا پێشوازی لە دیاریکردنی کاتی بەڕێوەچوونی هەڵبژاردن کرد.