هەڵوێستی سەرۆک بارزانی لەبارەی سێ پرسی گرنگ لە بەغدا

ئاڤا نیوز

سەرۆک بارزانی لە  بەغدا هەڵوێستی لەبارەی پرسە گرنگەکانی: دۆخی سیاسیی عێراق، بوونی ھێزەکانی هاوپەیمانان لە عێراق و یەکلاکردنەوەی پۆستی سەررۆکی پەرلەمانی عێراق دەردەبڕێت.

وێنە  گەورەکە: لە درێژەی سەردانەکەی بۆ شاری بەغدا، ئەمڕۆ پێنجشەممە سەرۆک بارزانی لەگەڵ سەرکردە و لایەنە سیاسییە سوننەکان لە ماڵی شێخ خەمیس خەنجەر لە شاری بەغدا کۆبووەوە.

ڕاگەیێنراوی فەرمی: لە کۆبوونەوەکەدا لایەنە سیاسییە سوننەکان داوایان لە سەرۆک بارزانی کردووە یارمەتیدەری پڕۆسەی سیاسیی عێراق بێت بۆ ئەوەی هەموو پێکهاتەکان بگەنە چارەسەر بۆ کێشە و داخوازییەکانیان.

زانیاریی زیاتر: سوننەکان جەختیان کردووەتەوە بوونی سەرۆک بارزانی لە بەغدا پشت و پەنایە بۆ پێکهاتەی سوننە و پێکهاتەکانی دیکەی عێراق و هێز دەداتە پڕۆسەی سیاسی.

گرنگترین هەڵوێستەکانی سەرۆک بارزانی  لە کۆبوونەوەکەدا:

- دۆخی عێراق: سەرۆک بارزانی وێڕای ئاماژەدان بۆ هۆکارەکانی سەردانی بۆ بەغدا و کۆبوونەوەی لەگەڵ لایەنەکانی ناو چوارچێوەی هەماهەنگی، ڕایگەیاند: کەشێکی ئەرێنی لە پڕۆسەی سیاسیی عێراقدا هاتووەتە ئارا کە لەسەر بنەمای دەستوور و بەپێی ڕێککەوتنەکان بەسەر کۆسپ و ناتەبایی و کێشەکاندا زاڵ ببین.

- هێزەکانی هاوپەیمانان: پەیوەست بە بوونی هێزەکانی هاوپەیمانان سەرۆک بارزانی جەختی کردەوە،  ئەو بابەتە ڕەهەندی نیشتیمانی هەیە و پێویستە بڕیاری دەستەجەمعی و نیشتیمانی لەوبارەیە هەبێت کە خزمەتی بەرژەوەندیی و سەقامگیریی عێراق و ناوچەکە بکات.

- پۆستی سەرۆکی پەرلەمان: لەبارەی پرسی دیاریکردنی سەرۆکی ئەنجوومەنی نوێنەرانی عێراقی سەرۆک بارزانی ئاماژەی بەوە داوە، بەرژەوەندیی گشتی و داهاتوو و چارەنووس لە سەرووی دەستکەوت و بەرژەوەندیی تاکەکەسی و حیزبییە و داوای کردووە لایەنە سوننەکان یارمەتیدەری یەکتر بن و ئەو پرسە بەزووترین کات چارەسەر بکرێت.