قوباد تاڵەبانی داوای لابردنی گەمارۆی سەر فڕۆكەخانەی سلێمانی لە توركیا دەكات

ئاڤا دیجیتاڵ

 قوباد تاڵەبانی، جێگری سەرۆكوەزیرانی هەرێمی كوردستان و یەشار گیولەر، وەزیری بەرگریی تورکیا کۆبوونەوە پرسی فڕۆکەخانەی نێودەوڵەتیی سلێمانییان تاوتوێ کرد.

بۆچی گرنگە: لە سێی نیسانی ساڵی ڕابردوو، كۆمپانیای توركیش ئێرلاین رایگەیاند، بە بڕیاری توركیا گەشتەكانی لە فڕۆكەخانەی سلێمانی راگیراوە، ئێستاش ماوەكەی تا 22-06-2024 درێژ كراوەتەوە و هۆكارەكەشی بۆ "جموجوڵی پەكەكە لەو فڕۆكەخانەیە وپارێزگای سلێمانی گەرێنراوەتەوە".

ئەوەی پێویستە بیزانیت: یەشار گولەر، وەزیری بەرگریی توركیا دوێنێ سێشەممە 06-02-2024 بە سەردانێك گەیشتە بەغدا و لەگەڵ بەرپرسانی باڵای عێراق كۆبووەوە، دوای سەردانەكەی بۆ بەغدا، وەزیری بەرگریی توركیا سەردانی هەرێمی كوردستانی كرد و لەگەڵ سەرۆك بارزانی و سەرۆكوەزیران بارزانی و نێچیرڤان بارزانی سەرۆكی هەرێمی كوردستان كۆبووەوە.

ڕاگەیێنراوی فەرمی: قوباد تاڵەبانی، جێگری سەرۆک وەزیران لەگەڵ یاشار گولەر، وەزیری بەرگریی تورکیا کۆبووەوە و پێکەوە پرسی فڕۆکەخانەی نێودەوڵەتیی سلێمانی و چەند بابەتێکی دیکەی جێی بایەخی هەردوولایان تاوتوێ کرد. لە کۆبوونەوەکەدا  کە ئێوارەی  چوارشەممە، حەوتی شوبات لە هەولێر بەڕێوەچوو، په‌یوه‌ندییه‌كانی توركیا له‌گه‌ڵ هه‌رێمی كوردستان و پتەوکردنی ئەو پەیوەندییانە خرانە بەرباس.

"دۆسیەی ئه‌منیی و دۆخی سەقامگیری عێراق و هه‌رێمی كوردستان تەوەرێکی تری کۆبوونەوەکە بوو، جەخت کرایەوە لەسەر گرنگی پاراستنی سەقامگیری و رێزگرتن لە سەروەریی خاکی هەردوو وڵات. هەر لە کۆبوونەوەکەدا باسی پرسی داخستنی ئاسمانی تورکیا بەڕووی فڕۆکەخانەی نێودەوڵەتی سلێمانی کراو  جێگری سەرۆک وەزیران داوای چارەسەرکردنی ئەو کێشەیەی کرد".