حاجی ئەحمەدی بۆ ئاڤا: هەڵبژاردن لە ئێران هیچ شتێک ناگۆڕێت

ئاڤا نیوز

 

حاجی ئەحمەدی، یەکێک لە سیاسیەکانی ڕۆژهەڵاتی کوردستان و ئەندامی بەڕێوەبەری کۆدار لە چاوپێکەوتنێکدا لەگەڵ ئاڤا دەڵێت "هەڵبژاردن لە ئێران هیچ شتێک ناگۆڕێت وگەلی کورد بەتووندی بایکۆتی هەڵبژاردنەکە دەکەن".

وێنە گەورەکە: لە قۆناغی یەکەمی هەڵبژاردنەکانی ئێراندا حزبە سیاسیەکانی ڕۆژهەڵاتی کوردستان لە ڕێگەی ئاڤا نیوزەوە پەیامیان بۆ خەڵکی ڕۆژهەڵاتی کوردستان نارد و داوای بایکۆتی هەڵبژاردنەکانیان کرد.

ئەوەی لە ئێران ڕوودەدات هەڵبژاردن نییە
عەبدولڕەحمان حاجی ئەحمەدی، بە ئاڤا نیوزی گوت:" ئەوەی لە ئێران ڕوودەدات هەڵبژاردن نییە، گەمەی هەڵبژاردنە، چونکە نە کورد نە سوننە و ژن ناتوانن خۆیان بەربژێر بکەن، کەسێک کە بەدڵی ڕابەری باڵا نەبێت ناکرێتە بەربژێر،ئەمەش شەرعییەتی نییە".

کورد بایکۆتی هەڵبژاردنەکە دەکات
حاجی ئەحمەدی بە ئاڤا نیوزی گوت:" نەک ئەم هەڵبژاردنە بەڵکو هەڵبژاردنەکانی پێشووش کورد هەڵبژاردنەکانی بایکۆت کردووە، چونکە ئەم هەڵبژاردنە هیچ شتێک لە ژیانی کەس ناگۆڕێت وهەموو شتێک کۆنترۆڵ کراوە".

هەڵبژاردن هیچ گرنگ نییە
"لەڕاستیدا لە ئێران شتێک نییە بەناوی هەڵبژاردن، ئەوەی هەیە نمایشێکی گشتییە بۆ ڕای گشتی جیهان، ئەگەر نا کەسێک کە  ڕابەری باڵا نەیەوێت هەرگیز نابێتە سەرۆککۆماری ئێران". حاجی وای  گوت.

هەمووان بایکۆت دەکەن
حاجی ئەحمەدی گوتیشی:"ئێران تەواوی میلەتەکانی دیکە و ڕەچەڵەکەکانی دیکە بایکۆتی هەڵبژاردنەکان دەکەن و بۆیان گرنگ نییە، چونکە هەمووان زۆر بەباشی دەزانن ئەمە شانۆگەرییەکە و هیچی لەسەر هیچ نییە".

دۆخەکە ناگۆڕێت
بە گوتەی حاجی ئەحمەدی " نەک پزیشکیان هەر کەسێکی دیکەش ببێتە سەرۆکۆماری ئێران هیچ لە دۆخەکە ناگۆڕێت، چونکە ئەوەی ڕوودەدات پەیوەستە بە پرسێکی گرنگەوە کە لە دەستی کەسدا نییە و ڕابەر بڕیاری کۆتایی دەدات".

بایکۆتیش گرنگ نییە
حاجی ئەحمەدی لە درێژەی قسەکانیدا بۆ ئاڤا نیوز گوتی:"لەڕاستیدا بایکۆتیش گرنگ نییە، چونکە ئەگەر 10 کەسیش بڕۆن بۆ هەڵبژاردن و یەک کەسیش بڕوات بۆ هەڵبژاردن بڕیار هەر لە دەستی ڕابەردایە و براوەی یەکەمی هەڵبژاردنەکان خامنەییە".