زانیاریی لەسەر دابەشنەکردنی دەرماڵەی قوتابییان دەخرێتەڕوو

ئاڤا نیوز 

بەڕێوەبەری گشتیی دیوانی وەزارەتی خوێندنی باڵا و توێژینەوەی زانستی هەرێمی كوردستان، هۆکاری دابەشنەکردنی دەرماڵەی قوتابییانی زانکۆ و پەیمانگاکان لە چەند مانگی ڕابردوو ئاشکرا دەکات.

بۆچی گرنگە: ئەو بڕە پارەیەی وەک دەرماڵە مانگانە بە قوتابیانی زانکۆ و پەیمانگاکان دەدرێت، هاوکارە پڕکردنەوەی بەشێک لە پێداویستییەکانی قوتابیان.

لێدوانی فەرمی: د.توانا نەجەف، بە ئاڤا نیوزی گوت: دابەشکردنی دەرماڵەی قوتابیان بەگوێرەی زانکۆکان دەگۆڕێت، زانکۆی وا هەیە دەرماڵەی مانگی چواری ئەمساڵی وەرگرتووە، زانکۆش هەیە تا مانگی 12ی پارساڵی وەرگرتووە.

زانیاریی زیاتر: دەرماڵەی یەک مانگی زانکۆی سلێمانی زیاتر لە 800 ملیۆن دینارە، وەزارەتی دارایی چەکی ئەم پارەیە خەرج ناکات و دەڵێ پارەی کاشم نییە، بەڵام زانکۆیەکی وەک سۆران چەکی پارەکەی سوکە و بۆی خەرج دەکرێت.

ئەوەی پێویستە بیزانیت: دەرماڵەی قوتابیان ڕەزامەندی ئەنجوومەنی وەزیران و وەزارەتەکانی دارایی و خوێندنی باڵای هەیە، نافەوتێت. توانا نەجەف وادەڵێت.

گۆشەیەكی دیكە: وەزارەتی خوێندنی باڵا و توێژینەوەی زانستی نووسراوی فەرمی بۆ خەرجکردنی دەرماڵەی ساڵی نوێی خوێندن ئاراستەی ئەنجوومەنی وەزیران کردووە.