لە %25 ی عێراقییەکان لەژێر هێڵی هەژاریدا دەژین

ئاڤا نیوز 

ناوەندێکی ستراتیژی بۆ مافەکانی مرۆڤ لە عێراق، ئاشکرای دەکات زیاتر لە 10 ملیۆن عێراقی لە ژێر هێڵی هەژاریی دا دەژین.

وێنە گەورەکە: بەپێی ئامارەکانی وەزارەتی پلاندانان، ساڵانە ملیۆنێک کەس لە عێراق زیاد دەکەن، ئەو زیادبوونەش کاریگەریی لەسەر بەرزبوونەوەی ڕێژەی هەژاریی و بێکاری هەبووە.

ڕاگەیێنراوی فەرمی: حازم ڕدینی، جێگری بەڕێوەبەری ناوەندەکە ڕایگەیاند: بەپێی داتاکانی وەزارەتی پلاندانان 25٪ی دانیشتوانی عێراق لەژێر هێڵی هەژاریدا دەژین کە زیاتر لە 10 ملیۆن کەس دەبن لە کۆی 43 ملیۆن دانیشتووی عێراق.

زانیاریی زیاتر: دوو ملیۆن خێزان لە ڕێگەی چاودێری کۆمەڵایەتیەوە مووچە وەردەگرن، ملیۆنێک خێزانی دیکە هەن شایەنی ئەوەن مووچەیان پێ بدرێت، کەچی لە بودجەی 2024 هیچ بڕە پارەیەکی نوێ بۆ پاراستنی ئەو توێژە دیاری نەکراوە.

ئەمەش بزانە: زیاتر لە ملیۆنێک و 650 هەزار کەس وەک بێکار لە عێراق تۆمارکراون، لە کاتێکدا کرێکارانی بیانی لە عێراق ژمارەیان دەگاتە نزیکەی ملیۆنێک کەس و نزیکەی 40 هەزاریان لە وەزارەتی کار تۆمارکراون.