سوودانی و باڵیۆزی تورکیا تاوتوێی ئاسایشی ناوچە سنوورییەکان دەکەن

ئاڤا نیوز  

سەرۆکوەزیرانی عێراق لەگەڵ باڵیۆزی تورکیا لە وڵاتەکەی تاوتوێی هەماهەنگی ئاسایشی هاوبەش لە ناوچە سنوورییەکان دەکەن، بە شێوەیەک کە سەروەری عێراق و خاکەکەی بپارێزێت و ڕێگری لە هەر پێشێلکارییەک بکات.

وێنە گەورەکە: تورکیا و عێراق زیاتر لە بیست یاداشتنامەی لێکتێگەیشتنیان لە بوارە جۆراوجۆرەکان و کەرتە جیاوازەکان لە میانی سەردانی سەرۆککۆماری تورکیا بۆ عێراق لە مانگی نیسانی ئەمساڵ واژۆکردووە.

چیرۆکی سەرەکی: ڕۆژی 8-7-2024 محەمەد شیاع سوودانی، سەرۆکوەزیرانی عێراق لە بەغدا پێشوازی لە ئینێل بۆرا ئینان، باڵیۆزی نوێی تورکیا لە عێراق کرد و هیوای سەرکەوتنی بۆ خواست لە ئەرک و کارەکانیدا.

ڕاگەیێنراوی فەرمی: نووسینگەی سەرۆکوەزیرانی عێراق ڕایگەیاند: لە دیدارەکەدا باس لە پەیوەندییە دوو قۆڵییەکانی نێوان هەردوو وڵات و گرنگی پتەوکردنی هەماهەنگی بنیاتنەر کرا، بۆ چالاککردنی ئەوەی لە میانی سەردانەکەی سەرۆکی تورکیا ڕەجەب تەیب ئەردۆغان بۆ بەغدا لە مانگی چواری ساڵی ڕابردوودا لەسەری ڕێککەوتبوون.