ئاڤا نیوز

 

ئەمشەو لیژنەیەکی دیکەی چاودێریی دارایی عێراق بەمەبەستی وردبینیکردن لە لیستی مووچەخۆرانی سێ وەزارەت و سەرۆکایەتییەک سەردانی هەولێر دەکات.

 

لێدوانی فەرمی: سەرچاوەیەک لە وەزارەتی دارایی هەرێمی کوردستان بە ئاڤا نیوزی گوت: لیژنەیەکی چاودێریی دارایی لەسەر ڕاسپاردەی هەردوو ئەنجوومەنی وەزیرانی هەرێمی کوردستان و عێراق دەگاتە هەولێر، سبەی چوارشەممە لەگەڵ دیوانی چاودێریی دارایی کۆدەبێتەوە، دواتر کاتە دیاریکراوەکانیان بۆ وردبینی بۆ دیاری دەکەن.

 

خاڵی ئەرێنی: ئامانج لە سەردانی لیژنەکەی چاودێریی دارایی عێراق، وردبینیکردنە لە لیستی ناوی مووچەخۆرانی وەزارەتی ناوخۆ، وەزارەتی پێشمەرگە، وەزارەتی کارەبا و سەرۆکایەتیی پەرلەمان، لەگەڵ تەوابوونی وردبینی لە هەر لیستێک پارەکەیان بۆ دەنێردرێت.

ئەوەی پێویستە بیزانیت: هاتنی ئەم لیژنەیە لەکاتێکدایە دوو ڕۆژە لیژنەیەکی دیکەی چاودێریی دارایی عێراق بۆ وردبینی لە لیستی مووچەی هێزەکانی پێشمەرگە لە هەولێرە. ئەمڕۆ سێشەممە شۆڕش ئیسماعیل، وەزیری پێشمەرگە ڕایگەیاند، لەم دوو ڕۆژەدا کێشەکە چارەسەر دەبێت.