بەغدا بۆ هەولێر: دەروازەکانی باشماخ و پەروێزخان "بوونەتە بەڵایەکی گەورە" بۆمان

ئاڤا نیوز

شاندێکی حکومەتی عێراق بەهۆی "هاوردەکردنی قاچاخ" خاڵە سنوورییەکانی باشماخ و پەروێزخان بە "بەڵایەکی گەورە" دادەنێن، لەڕووی پرۆتۆکۆڵی و جێبەجێکردنی ڕێنماییەکانیش دەروازەی ئیبراهیم خەلیل بە جوانترین نموونەی خاڵی سنووری پێناسە دەکەن.

وێنە گەورەکە: ڕێکەوتی 01-07-2024  لە بەغدا، کۆبوونەوەی هاوبەشی ژمارە 2ـی نێوان هەولێر و بەغدا لەبارەی دەروازە سنوورییەکان کرا. شاندی هەرێمی  کوردستان لە ڕێبەر ئەحمەد، وەزیری ناوخۆ و ئاوات شێخ جەناب، وەزیری دارایی و ئابووری پێکهتابوو. لە کۆبوونەوەی  ئەمڕۆی ئەنجوومەنی وەزیرانیش نێوەڕۆکەی کۆبوونەوەکەیان خستووەتەڕوو.

زانیاریی تایبەت: بەگوتەی ڕێبەر ئەحمەد، "لە کۆبوونەوەکەی بەغدا لیژنەی حکومەتی فیدراڵی عێراق ڕاشکاوانە ڕایانگەیاندووە خاڵە سنوورییەکانی باشماخ و پەرێزخان بوونەتە بەڵایەکی گەورە لەسەر عێراق، چونکە بوونەتە سەرچاوەی هاوردەکردنی کەرەستە و ماددەی خۆراکیی خراپ بەشێوەی قاچاخ".

زانیاریی زیاتر: شاندی  حکومەتی عێراق ئەو دوو خاڵە سنوورییەیان لەگەڵ دەروازەی سنووریی ئیبراهیم خەلیل بەراورد کردووە و لەڕووی پرۆتۆکۆڵی و جێبەجێکردنی ڕێنماییەکان بە جوانترین نموونەی خاڵی سنوورییان ناوبردووە، هیوایان خواستووە سەرجەم خاڵە سنوورییەکانی عێراق هاوشێوی خاڵی سنووریی ئیبراهیم خەلیل-یان لێبێت.

بۆچوونی بەرامبەر: شاندی هەرێمی کوردستان ئامادەیی خۆی ڕاگەیاندووە بۆ چەسپاندنی کۆنترۆڵی تەواو لەسەر سەرجەم خاڵە سنوورییەکان لە ڕێگەی هێزی هاوبەشی وەزارەتی ناوخۆ و هێزی پێشمەرگە.