کاڵای ئێرانی 25%ـی کۆی هاوردەی عێراق پێک دەهێنێت

ئاڤا نیوز

لە نۆ مانگی ڕابردوودا هەناردەی ئێران بۆ عێراق بە ڕێژەی 30% زیادی کردووە. کاڵای ئێرانی پشکی شێری لە کۆی هاوردەکانی عێراق پێک هێناوە و ڕێژەی 25%ـی کۆی کاڵا هاوردەکراوەکان پێک دەهێنێت. 

وێنە گەورەکە: بەهۆی ئەوەی عێراق نەیتوانیوە لە فرەچەشنکردنی سەرچاوەکانی داهات سەرکەوتوو بێت و لە زۆرینەی بەرهەمەکانی پشت بە هاوردە دەبەستێت، ساڵ لە دوای ساڵ هاوردەی کاڵاکانی لە ئێران زیاتر دەبێت. بەگوێرەی دوایین داتا لە هەر چوار کاڵایەک لە بازاڕی عێراقدا یەکێکیان ئێرانییە.

لێدوانی فەرمی: جیهانبەخش سنجابی، ئەمینداری گشتیی ژووری بازرگانیی هاوبەشی عێراقی - ئێرانی ڕایگەیاند: لە ماوەی نۆ مانگی ڕابردوودا هەناردەی وڵاتەکەیان بۆ عێراق بە ڕێژەی 30٪ زیادی کردووە .

ئەمەش بزانە: هەناردەی ئێران بەدرێژایی ساڵی ڕابردوو زیاتر لە 10 ملیار دۆلار بووە بۆ عێراق. قەبارەی ئاڵوگۆڕی نێوان هەردوو وڵات زۆر لاسەنگە، بەجۆرێک ئێران 95٪ی کاڵا هەناردەی عێراق دەکات، لەبەرامبەردا تەنیا 5%ی لە عێراق هاوردە کردووە.