ئەمریکا: لەگەڵ ناچارکردن و ناردنەوەی زۆرەملێی پەناخوازان نین لە عێراق

ئاڤا نیوز 

 

باڵیۆزی ئەمریکا لە عێراق ڕایدەگەیێنێت کە ئەوان لەگەڵ ناچارکردن و ناردنەوەی زۆرەملێی ئاوارە و پەنابەران نین لە کەمپەکان و داوایەکیش ئاراستەی هەردوو حکومەتی هەرێمی کوردستان و عێراق دەکات.

 

وێنە گەورەکە: حکومەتی هەرێمی کوردستان و حکومەتی عێراق لەسەر میکانزمی داخستنی کەمپەکان و ناردنەوەی ئاوارەکان ناکۆکن و وەزیری ناوخۆی هەرێمی كوردستان دەڵێت: "بەبێ ڕاوێژ لەگەڵ هەرێمی كوردستان و یوئێن، بڕیاری ناردنەوەی ئاوارەكان دراوە". 

 

لێدوانی فەرمی: ئەلینا ڕۆمانۆوسكی، باڵیۆزی ئەمریكا لە عێراق لە ڕێوڕەسمەکە ڕایگەیاند: داوا لە حکومەتی عێراق و هەرێمی کوردستان دەکەم کار بۆ گەڕانەوەی ئاوارەکان بۆ سەر ماڵ و حاڵی خۆیان بکەن، بەڵام "نابێت فشاریان بخرێتەسەر بۆ ئەوەی لە کەمپەکان بمێننەوە، هاوکات نابێت بەزۆریش ناچار بکرێن بگەڕێنرێنەوە شوێنی نیشتەجێبوونیان".

 

ئەوەی پێویستە بیزانیت: ئەم گوتانەی ڕۆمانۆوسکی لە میانی پێشکەشکردنی گوتارێک لە ڕێورسمی ڕاگەیاندنی ڕێنمایی ڕێکخستنی کاروباری پەناخوازان لە هەرێمی کوردستان هات کە سەرۆکوەزیران مەسرور بارزانییش ئامادەبوو. 

 

زانیاریی زیاتر: بەگوتەی ڕۆمانۆوسکی، لەگەڵ حکومەتی هەرێمی کوردستان و عێراق و ڕێکخراوە نێودەوڵەتییەکان و کۆمەڵگەی نێودەوڵەتی کاریان بۆ گەیاندنی هاوکاری بۆ ئاوارە عێراقییەکان و گەڕانەوەیان بۆ ناوچەکانیان کردووە.