عێراق ڕۆژێکی لە خشتەی پشووەکانی ساڵ لاداوە

ئاڤا نیوز

 

ڕۆژی 14ـی تەمموزی هەموو ساڵێک، بەبۆنەی ڕاگەیاندنی دامەزراندنی کۆماری عێراق لە عێراق و هەرێمی کوردستان پشووی فەرمی بوو، بەڵام ئەمساڵ لە عێراق ناکرێتە پشوو.

 

وێنە گەورەکە: ڕۆژی 22-05-2024، پەرلەمانی عێراق دەنگی لەسەر یاسای پشووە فەرمییەکان دا و جگە لە پشووی ڕۆژانی هەینی و شەممە، 11 ڕۆژی دیکەی وەک پشووی فەرمی لە سەرانسەری وڵات ناساند.

 

لێدوانی فەرمی: حەیدەر مەجید، گوتەبێژی ئەمینداریەتی گشتیی ئەنجوومەنی وەزیران بە میدیای عێراقی ڕاگەیاند: یاسای نوێی پشووە فەرمییەکان کە بەم دواییانە لە پەرلەمان پەسەند کرا، 14ـی تەمموز لەخۆ ناگرێت، ئەمەش مانای ئەوەیە دەوامی فەرمییە".

 

لەلایەکی دیکەوە: بەپێی ڕۆژژمێری حکومەتی هەرێمی کوردستان ڕۆژی 14ـی تەمموز بەبۆنەی دامەزراندنی کۆماری عێراق پشووە. 

 

ئەوەی پێویستە بیزانیت: ڕۆژی 14ـی تەمووزی 1958، لە عێراق کۆتایی بە دەسەڵاتی پاشایەتی ھێنرا و ڕژێمی کۆماری ڕاگەیێنرا.