تورکیا "کوژرانی بەرپرسێکی باڵای پەکەکە"ی ڕاگەیاند

ئاڤا دیجیتاڵ

 

بەرپرسێکی باڵای پارتی کرێکارانی کوردستان (پەکەکە) کە ناوی لە لیستی سووری هەواڵگریی تورکیا هەبوو، ئەمڕۆ پێنجشەممە لە سنووری نێوان هەرێمی کوردستان و تورکیا "کوژرا". 

 

ئەوەی پێویستە بیزانیت: یونس دەمیر، ئەندامی مەڵبەندی فەرماندەیی بەرگریی میدیای پارتی کرێکارانە، بەرپرسی زۆربەی ئۆپەراسیۆنەکانی دژ بە سوپای تورکیا بووە، بەگوێرەی زانیارییەکانی هەواڵگریی تورکیا، جگە لەوەی ناوی لە "لیستی سووری میت"ـدا هەبووە، لە ئینتەرپولیش داواکراو بووە. 

 

لێدوانی فەرمی: هەواڵگریی تورکیا ڕایگەیاند: ئەو بەرپرسەی پارتی کرێکاران، لە ئۆپەراسیۆنێکی ناوچەی (پەنجە - کلیت)ـی سنووری نێوان هەرێمی کوردستان و تورکیا کراوەتە ئامانج.

 

باكگراوند: شڤان گەڤەر، ناسراو بە یونس دەمیر، ساڵی 1955 پەیوەندی بە ڕێکخراوی پارتی کرێکاران کردووە، لەساڵی 2014 وەک ئەندامی فەرماندەی باڵای بەرگریی میدیای قەندیل دەستبەکاربووە، لە ساڵی 2021ـەوە لە زاپ و پەنجە کلیت چالاکی دژ بە سوپای تورکیا کردووە.