جێگری سەرۆکی پەرلەمانی عێراق داوایەک لە لایەنەکانی کەرکووک دەکات

ئاڤا نیوز 

جێگری سەرۆکی پەرلەمانی عێراق ڕایگەیاند، پێویستە لایەنەکان هەوڵەکانیان بۆ یەکلاکردنەوەی پۆستە ئیدارییەکان چڕ بکەنەوە.

وێنە گەورەکە: ئێوارەی ئەمڕۆ 11-7-2024، ئەنجوومەنی پارێزگای کەرکووک یەکەم کۆبوونەوەی خۆی ئەنجام دا، دواتر کۆبوونەوەکە هەڵگیرا و لایەنەکان ڕێککەوتن لە ماوەی 30 ڕۆژدا پۆستەکانی پارێزگاکە یەکلایی بکەنەوە.

لێدوانی فەرمی: شاخەوان عەبدوڵا، جێگری سەرۆکی پەرلەمانی عێراق، ڕایگەیاند: خەڵکی کەرکووک پێویستیان بە خزمەتکردنە و چاویان لە دیاریکردنی پارێزگار و گۆڕانکاری یەکە ئیدارییەکانە، ئێستا داخڵی ماوەی یاسایی بووین و پابەندین.

زانیاریی زیاتر:"هەموو لایەنەکان دەبێت هەوڵەکانیان بۆ یەکلایکردنەوەی پۆستە ئیدارییەکان چڕ بکەنەوە، ئێمە چاوەڕێین لە ڕۆژانی داهاتوودا دانیشتنێکی دیکە بکرێت و پارێزگاری شەرعی هەڵببژێردرێت". شاخەوان عەبدوڵڵا وای گوت.

ئەوەی پێویستە بیزانیت: بەگوێرەی ئیستحقاقی هەڵبژاردن پۆستی پارێزگاری کەرکووک بۆ کورد دەبێت، هاوکات پێکهاتەکانی دیکەی شاری کەرکووک بەگوێرەی ئیستحقاقی خۆیان بەرکەوتەکان وەردەگرن.

باکگراوند: دوای تێپەڕینی 20 ساڵ بەسەر ئەنجامدانی هەڵبژاردنی ئەنجوومەنی پارێزگاکە، بۆ جاری دووەم لە 18-12-2023 هەڵبژاردنی ئەنجوومەنی پارێزگای کەرکووک بەڕێوەچوو.