پێشەوا ئەحمەد: لە 10 شاری هەرێمی کوردستان گوێمان لە گەنجان گرت

ئاڤا نیوز

لە مەراسیمی دەرچوانی خولی ئۆفیسی دەستپێشخەری، سەرپەرشتیاری پڕۆژەی ڕاهێنانی گەنجان گوتی، "سەرەتای پڕۆژەکە گوێمان لە گەنجانی ناوچە جیاوازەکان گرت بۆ ئەوەی بزانین پێویستە چی بکەین".

وێنە گەورەکە: لە شەش مانگی ڕابردوودا ئۆفیسی دەستپێشخەری و پەیوەندییەكانی حکومەتی هەرێمی کوردستان، ڕاهێنانی بە چوار هەزار و 200 گەنجی ناوچە جیاوازەکانی هەرێمی کوردستان و تاراوگە کردووە.

چیرۆکە سەرەکیەکە:  پێشەوا ئەحمەد بەڕێوەبەری ستێپ ئەپ لە ئۆفیسی دەستپێشخەری حکومەتی هەرێمی کوردستان لەسەر سەتیجی ڕێوڕەسمەکە گوتی: سەرەتای پڕۆژەکە سەردانی 10 شاری ناوچە جیاوازەکانی هەرێمی کوردستانمان کرد و گوێمان لە گەنجان گرت و گەیشتینە سێ خاڵ:
یەکەم: ئومێد بدرێتەوە بە گەنجان و ئەم وڵاتەیان خۆشبوێت.
دووەم: پەرە بە تواناکانیان بدرێت.
سێیەم: بە سەربەخۆیی بیربکەنەوە.

بۆچی گرنگە: پێشەوا ئەحمەد دەڵێت: ئەو گەنجانەی بەشداری خولە شەش مانگیەکەیان کردووە، 11 کارامەییمان فێرکردوون، دیارترینییان ئەوە بووە چۆن وڵاتەکەیان خۆشبوێت، چۆن نەکەونە ژێر کاریگەری بیرکردنەوەی نەرێنی، و چۆن پەرە بە هەستی نەتەوەییان بدرێت، دوای تەواوبوونی خولەکە %98ی ئەو گەنجانە گوتویانە سوودمان لەو پڕۆژەیە وەرگرتووە.