کەیسی یەکێک لە پاسەوانەکانی موراد کانی کوردەیی بۆ دادگەکانی هەولێر دەگوازرێتەوە

ئاڤا نیوز 

باوکی "شەهید سەرکار" دەڵێت " ماوەی سێ ساڵ بەسەر تیرۆرکردنی کوڕەکەم تێپەڕیوە، بەڵام دادگەکانی سلێمانی هیچ بەدواداچوونێکیان بۆ کەیسەکە نەکردووە".

لێدوانی فەرمی: فاخیر عومەر، باوکی "شەهید سەرکار"، بە ئاڤا نیوزی گوت: "سێ ساڵە کوڕەکەم لەنێو جەرگەی ڕانیە تیرۆرکراوە و سکاڵامان لە دادگەکانی سلێمانی تۆمار کردووە، بەڵام تا ئێستا هیچ لیپێچینەوە و بەدواداچوونێک لەسەر کەیسەکە نەکراوە، بۆیە لە داواکاری گشتیی هەولێر سکاڵامان تۆمار کرد و داوای گواستنەوەی سکاڵای دادگەکانی سلێمانیمان بۆ هەولێر کرد".

زانیاریی زیاتر: باوکی شەهید سەرکار دەڵێت: " کوڕەکەم لەڕانیە بەبەرچاوی خەڵکەوە لەلایەن هێزێکی ئەمنیی سلێمانی تیرۆرکرا، داوای سەروەری یاسا و مافی خۆمان دەکەین، لە دادگەکانی سلێمانی بێ ئومێد بووین، بە ئومێدەوە ڕوومان لە دادگەکانی هەولێر کردووە تا مافمان وەربگرێت". 

ئەوەی پێویستە بیزانیت: بەگوتەی فاخیر عومەر" شەش تۆمەتبار لە کەیسی کوڕەکەی دیاریکرابوون، تەنیا داوای سێ کەسی کردووە، کە بەشداربوون لە تیرۆرکردنی کوڕەکەی".

باکگراوند: ئێوارەی 25-11-2021، عەمید موراد کانی کوردەیی و سێ لە پاسەوانەکانی بە ناوەکانی: سەرکار فاخیر، خۆشناو و هاوکار کوژران.