کەمئاویی بەشێکی زۆری گەڕەکەکانی هەولێر چارەسەر دەکرێت

ئاڤا نیوز

 

لە پارێزگای هەولێر کۆبوونەوەیەک کراوە بۆ بەدواداچوونی گرفتی کەمئاوی لە چەند گەڕەکێکی هەولێر و چەند بڕیارێکی نوێ دراون و ڕێکارەکان دەستیانپێکردووە.

 

وێنە گەورەکە: ساڵانە لە سەرەتای وەرزی هاوین ژمارەیەک گەڕەکی هەولێر ڕووبەڕووی کەمئاوی دەبنەوە، بەڵام ئەمساڵ پارێزگای هەولێر چەند میکانیزمێکی گرتووەتەبەر بۆ چارەسەرکردن.

 

لێدوانی فەرمی: ئاری ئەحمەد بەڕێوەبەری گشتیی ئاوی هەرێمی کوردستان بە ئاڤا نیوزی ڕاگەیاند: ئێستا نۆ بیری نوێ بۆ ناوشار و دەرەوەی شار لێدەدرێن، لەگەڵ ئەوەدا چاکسازی لە چەند بۆرییەکی ئاوی ئیفراز سێ دەستیپێکردووە و بەمزووانە چارەسەر دەکرێت.

 

زانیاریی زیاتر: "ئەم هاوینە 231 بیر لەگەڵ مۆلیدەی گەڕەکەکان بەستراونەتەوە، 120 بیری دیکەش مۆلیدەی لەسەرە، بەمزووانە هەشت بیری دیکە بە مۆلیدە دەبەسترێنەوە، تاڕادەیەکی زۆر کەمئاوی بەشێکی زۆری گەڕەکەکان چارەسەر دەکات". ئاری ئەحمەد ئەمەی گوت.

 

چارەسەرەکان: بەڕێوەبەری ئاوی هەرێمی کوردستان دەڵێت: هیچ گەڕەکێکی هەولێر نییە هەمووی بێ ئاو بێت، بەڵکو چەند کۆلانێک لە گەڕەکێک بێ ئاون و چارەسەری هەمووی دەکرێت، ئەوانەشی چارە نەکرێن بە تانکەر ئاویان پێ دەگەیێنرێت، تاوەکو چارەسەری کۆتاییان بۆ دەکرێت.