هاونیشتمانیانی دوو گەڕەکی کەلار 200 مەتر زەوییان پێدەدرێت

ئاڤا نیوز

 

بڕیارە هەر ماڵێکی گەڕەکەکانی لیوا ڕەشەکە و جەمەلۆنەکەی قەزای کەلار 200 مەتر زەوییان لە گەڕەکێکی نوێ پێبدرێت.

 

وێنە گەورەکە: نزیکەی 35 ساڵە دوو باڵەخانەی ڕژێمی پێشووی عێراق لە کەلار بوونەتە شوێنی نیشتەجێبوون و فراوانکراون، کراون بە گەڕەک لە خانووەکان بەشێوەیەکی زێدەڕۆ دروستکراون، بڕیاری چۆڵکردنی گەڕەکە دراوە، حکومەتی هەرێمی کوردستانیش بڕیاری قەرەبووی هەموو ماڵێکی ئەو دوو گەڕەکەی دەرکردووە.

 

لێدوانی فەرمی: ئەکرەم ساڵح، سەرۆکی شارەوانیی کەلار بە ئاڤا نیوزی گوت: ماوەیەک بوو ڕێکارەکانی قەرەبووکردنەوە وەستابوون، ئەو شوێنەی بۆ قەرەبوو دیاری کراوە زەوی کشتوکاڵین، تاوەکو هەموو جووتیارەکان قەرەبوو کرانەوە کاتی پێویست بوو، ئێستا هەموو کارەکان تەواو کراون و ماڵەکانی ئەو دوو گەڕەکە لەم هەفتەیەوە دەتوانن بێنە شارەوانی بۆ دەستپێکردنی مامەڵەکان.

 

زانیاریی زیاتر: 163 ماڵ لەو دوو گەڕەکە هەن و لەبەرامبەر پێدانی پارچەیەک زەوی ئەوان هیچ بڕە پارەیەک نادەن. 

 

ئەوەی پێویستە بیزانیت: بڕیارە خزمەتگوزرایی پێویست بۆ ئەو گەڕەکە نوێیە دەستپێبکات و لە ماوەی ئەمساڵدا تەواوی ماڵەکانی هەردوو گەڕەکی لیوا ڕەشەکە و جەمەلۆنەکە شوێنەکانیان چۆڵ بکەن.