سیستمی ژمێریاری لەنێوان هەرێمی کوردستان و عێراق یەکدەخرێت

ئاڤا نیوز 

 

بڕیارە لە ماوەیەکی نزیکدا کارەکانی ئەو لیژنەیە کۆتایی بێت کە بۆ یەکخستنی سیستمی ژمێریاری و دارایی وەزارەت و فەرمانگەکانی حکومەت لە عێراق و هەرێمی کوردستان دانراوە، بە تەواوبوونی سیستمی ژمێریاری لەنێوان هەرێمی کوردستان و عێراق یەکدەخرێت. 

 

وێنە گەورەکە: چەند مانگێکە لیژنەیەک پێکهاتووە لەنێوان وەزارەتی دارایی هەرێمی کوردستان و حکومەتی فیدراڵی بۆ یەکخستنی سیستمی دارایی و ژمێریاری لە فەرمانگەکانی حکومەت.

 

زانیاریی بەدەستهاتوو: سەرچاوەیەک لە وەزارەتی دارایی و ئابووریی هەرێمی کوردستان بە ئاڤا نیوزی گوت: د. هەیسەم حەسەن، ڕاوێژکاری سەرۆکوەزیرانی عێراق ڕۆژی یەکشەممە 14-07-2024 هاتووەتە وەزارەت و لەگەڵ وەزیری دارایی کۆبووەتەوە، بڕیارە تاوەکو کۆتایی ئەم مانگە لیژنەکە کارەکانی بە کۆتایی بهێنێت و وەزارەت و دامەزراوەکان لە سەرتاسەری عێراق یەک سیستمی ئیدارەدانی دارایی و ژمێریاری پەیڕەو دەکەن.

 

زانیاریی زیاتر لە ماوەی مانگی داهاتوودا چەندین خولی هاوبەش بۆ فەرمانبەرانی ژمێریاریی وەزارەت و فەرمانگەکانی حکومەتی هەرێمی کوردستان و حکومەتی فیدراڵی دەکرێنەوە، تاوەکو فێربکرێن سیستمە نوێیەکە چۆن کاری پێدەکرێت.

 

ئەوەی چاوەڕوان دەکرێت: بەشێک لە وەزارەتەکان بۆ ئیدارەدانی دارایی سیستمی لامەرکەزی پەیڕەو دەکەن، بەو واتایەی خۆیان لەسەر داهاتی خۆیان خەرجییەکانیان دەکەن، ئەمەش وایکردووە شێوازی ئیدارەدانی دارایی و ژمێریاری جیاواز بێت، بەڵام ئەمە بەتەواوی دەگۆڕێت و یەکدەخرێت.