دوو کەس 100 دۆنم زەوی دەسووتێنن و دەستگیر دەکرێن

ئاڤا نیوز

 

لە سنووری ناحیەی خەلەکان 100 دۆنم زەوی سووتاوە، دوای لێکۆڵینەوە دەرکەوتووە دوو کرێکار ئاگرەکەیان کردووەتەوە.

 

وێنە گەورەکە: ساڵانە لەگەڵ دەستپێکی وەرزی هاوین ڕووداوەکانی ئاگر کەوتنەوە لە پووش و پاوان زیاد دەکەن، ئەمساڵیش بە هەزاران دۆنم زەوی پووش و پاوان سووتاون.

 

لێدوانی فەرمی: عەمید هێمن کەمەرخان، بەڕێوەبەری ڕاگەیاندنی پۆلیسی دارستان و ژینگەی سلێمانی بە ئاڤا نیوزی ڕاگەیاند: لە گوندی شێخ مەنسوریانی ناحیەی خەلەکان ئاگرێکی گەورە لە پووش و پاوان کەوتەوە، دوای چوار کاتژمێر ئینجا توانرا ئاگرەکە کۆنتڕۆڵ بکرێت، بەهۆی ئاگرەکەوە دەیان دار بەڕوو سووتاون.

 

هۆکارە زانراوەکان: عەمید هێمن کەمەرخان دەڵێت، کاتێک لێکۆڵینەوەمان لە ڕووداوەکە کرد، دەرکەوت دوو کرێکاری خەڵکی شارەکانی خوارووی عێراق کێڵگەیەکی پەلەوەرییان پاککردوەتەوە و ئەوان بوونەتە هۆکاری ئاگر کەوتنەوەکە، هەردووکیان دەستگیرکراون.