ئەمساڵ ئاکرێ لە بەرهەمی برنج ژمارەی پێوانەیی تۆمار دەکات

ئاڤا نیوز

 

ئەمساڵ پلانی کشتوکاڵی ئاکرێ ئەوەیە بەرهەمی برنج زیاد بکەن، بۆ ئەوەی هەناردەی دەرەوەش زیاد بێت.

 

وێنە گەورەکە: برنجی ئاکرێ لە بەناوبانگترین جۆری برنجە لەسەر ئاستی هەرێمی کوردستان، چەند ساڵێکە هەناردەی دەرەوەی وڵات دەکرێت.

 

لێدوانی فەرمی: فازڵ مستەفا، بەڕێوەبەری کشتوکاڵی ئاکرێ بە ئاڤا نیوزی ڕاگەیاند: پاڵپشتی کابینەی نۆیەم لە کەرتی کشتوکاڵ و زیادکردنی ڕێژەی هەناردەکردن بۆ وڵاتانی ئەمریکا و ئەوروپا، وای کردووە جووتیارانی ئاکرێ ئەمساڵ ڕێژەی چاندنی برنج زیاد بکەن.

 

خاڵی ئەرێنی: فازڵ مستەفا دەڵێت، ئەمساڵ لە قەزای ئاکرێ 12 هەزار و 500 دۆنم زەوی بە برنج داچێندراوە، ساڵی پار ئەو ڕێژەیە نەدەگەیشتە 12 هەزار دۆنم، لە هیچ ناوچەیەکی هەرێمی کوردستان بەو ئاستە برنج نەچێندراوە.

 

ئەوەی پێویستە بیزانیت: لە پارێزگای دهۆک، جگە لە قەزای ئاکرێ، لە قەزاکانی بەردەڕەش و ئامێدیش برنج دەچێندرێت، هەریەکە لەجۆرەکانی برنجی شەش مانگی، عەنبەر، تەحالوف کە پێنج جۆری هەیە ناودەنگیان هەیە.

 

باکگراوند: ساڵی پار حکومەتی هەرێمی کوردستان 23 هەزار تۆن برنجی هەناردەی وڵاتانی ئەوروپا و ئەمریکا کردووە، چاوەڕوان دەکرێت ئەمساڵ بەرهەمی برنجی پارێزگای دهۆک بە تێکڕا بگاتە 20 هەزار تۆن.