دەنگی چەند تەقینەوەیەک لە باشووری بەغدا دەبیسترێت

ئاڤا نیوز

 

لە باشووری بەغدا، دەنگی چەند تەقینەوەیەكی یەك لەدوای یەك لە چەند كۆگایەكی چەك بیسترا، حەشدی شەعبی دەڵێت هیچ زیانێکی نەبووە و لێکۆڵینەوە دەکەن.

وێنە گەورەكە: ئەمشەو چەند كۆگایەكی چەك و تەقەمەنی لە ناوچەی عوێریج لە باشووری شاری بەغدا تەقیونەتەوە و ئاگر و دوكەڵەكەی لە چەندین ناوچەی پایتەختی عێراق دەبینرێت.

زانیاریی بەدەستهاتوو: بەپێی هەواڵی میدیا عێراقی و عەرەبییەكان، دەنگی تەقینەوەكان بەردەوامن و تاوەكو ئێستا نازانرێت ئەو كۆگایانە بە درۆن كراونەتە ئامانج یان بە هۆی كەوتنەوەی ئاگرەوە تەقیونەتەوە.

ئەوەی لەوبارەیەوە دەگوترێت: ماڵپەڕی سكای نیوزی عەرەبی باس لەوەدەكات كۆگاكان خاوەندارێتییان بۆ حەشدی شەعبی دەگەڕێتەوە، میدیاکانی نزیک لە حەشدی شەعبیش دەڵێن بە هۆی شۆڕتی کارەباوە بووە.

 

ڕاگەیێنراوی فەرمی: ده‌سته‌ی حه‌شدی شه‌عبی ڕایگەیاند: تەقینەوەیەک لە کۆگاکانی لیوای 42ی فەرماندەیی ئۆپەراسیۆنەکانی سەڵاحەددین  ، لە ناوچەی یوسفیەی باشووری بەغدا ڕوویداوە و لیژنەیەکی تەکنیکی تایبەت پێکهێنراوە بۆ ده‌ستنیشانكردنی هۆکاری تەقینەوەکە، ڕووداوەکە هیچ زیانێكی گیانی لێنه‌كه‌وتووەتەوە.