هەرێمی کوردستان و عێراق لەبارەی باج لەسەر چەند خاڵێک ڕێککەوتن

ئاڤا نیوز

پاش گفتوكۆ و بەڕێوەچوونی ژمارەیەک كۆبوونەوە، حكومەتی هەرێمی كوردستان و حكومەتی عێراق لەسەر بابەتی باج ڕێككەوتن.

وێنە گەورەكە: شاندێكی لیژنەی باڵای ڕێكخستنەوەی باجی حكومەتی عێراق لە هەرێمی كوردستانن و ژمارەیەك كۆبوونەوەیان لەگەڵ وەزیری دارایی و ژمارەیەك بەرپرسی دیكەی پەیوەندیداری هەرێمی كوردستان كردووە.

ڕاگەیێنراوی فەرمی: وەزارەتی دارایی و ئابووریی هەرێمی كوردستان ڕایگەیاند: لەگەڵ شاندی حكومەتی عێراق، لەسەر چەند خاڵێک لەبواری باج گەیشتینە ڕێکكەوتن، کە دەبێتە کارئاسانی بۆ ئەو کارگە و کۆمپانیا و بانکانەی لە هەرێمی کوردستان و عێراق کاردەکەن.

زانیاریی زیاتر: گرنگترین خاڵەكانی ڕێككەوتنەكە، داننانە بە پاکانەی باجی هەرێم لەلایەن حکومەتی عێراقەوە، هەروەها چارەسەرکردنی کێشەی کارگەکانی کوردستان، کە پێشتر داوای باجیان لێدەکردن بە بیانووی ئەوەی بەرهەمەکانیان لە ناوچەکانی باشوور و ناوەڕاستی عێراق ساغ دەکەنەوە، بۆ لەمەودوا ئەو کارگانەی كه‌ لە کوردستانن دەبێت باجی داهاتەکانیان لە کوردستان بدەن. 

گۆشەیەكی دیكە: چارەسەرکردنی کێشەی پێدانی سووتەمەنی بۆ کارگەکانی هەرێمی کوردستان بە نرخی هاندراو کە ماوەیەکە پێدانی سووتەمەنیان بەو کارگانە ڕاگرتووە، ڕێکەوتن لەسەر یەکخستنی ڕێکار و ڕێوشوێنەکانی وەرگرتنی باج، هاوكات ڕێككەوتن لەسەر بانکەکان کە بارەگای سەرەکی بانکەکە بکرێتە بنەما بۆ وەرگرتنی باج، هەروەها گرتنەبەری ڕێوشوێنی گونجاو بۆ ڕێگریکردن لە خۆدزینەوە لە باج.