هەڵوێستی بانکی ناوەندیی عێراق لەسەر گۆڕانکاری لە بەهای دینار و لابردنی سفرەکانی سەر دراوەکە

ئاڤا نیوز

 

جێگری پارێزگاری بانکی ناوەندیی عێراق دەڵێت، لەم کاتەدا هیچ بەرنامەیەکیان نییە بۆ دووبارە دەستکاریکردنی بەهای دینار بەرامبەر بە دۆلاری ئەمریکی تا کاریگەری نەکاتە سەر دۆخی ئارامی دارایی وڵات، ئاشکراشی دەکات کە نیازی لابردنی سفرەکانی سەر دیناری عێراقییان هەیە.

 

وێنە گەورەکە: مانگی شووباتی ساڵی 2023 حکومەتی عێراق بڕیاری دا بەهای دینار بەرامبەر دۆلار دابەزێنێت و لەو کاتەوە بانکی ناوەندی نرخی 100 دۆلاری ئەمریکی بە 132 هەزار دینار بە بانکەکان، بازرگانان و هاووڵاتیان دەفرۆشێت، بەڵام ئەم نرخە لە بازاردا جیاوازە و ئەمڕۆ 100 دۆلاری ئەمریکی لە بازارەکانی عێراق و کوردستان بە 141 هەزار و 650 دینارە.

 

لێدوانی فەرمی: عەممار خەڵەف، جێگری پارێزگاری بانکی ناوەندیی عێراق بە کەناڵی CNBCـی ئەمریکی ڕاگەیاند، بانکی ناوەندیی ئێستا خاوەنی 170 تۆن زێڕە کە دەکاتە 20%ـی کۆی یەدەگی بانکەکە بەوەش عێراق چوارەمی وڵاتانی عەرەبی و 29هەمی جیهانە لە یەدەگی زێڕدا.

 

باسی لەوەشکردووە،  لەم کاتەدا هیچ بەرنامەیەک بۆ گۆڕانکاری لە بەهای دیناردا نییە تا کاریگەری نەکاتەسەر ئارامی ئابووریی وڵات، بەڵام خواستێک بۆ لابردنی سفرەکانی سەر دیناری عێراق هەیە، چونکە ئەم هەنگاوە دەبێتەهۆی کەم کردنەوەی بارگرانی کەڵكەبونی دراوى نەختینە لەسەر کەرتی دارایی.