عێراق سێ فڕۆکەخانەی دیکەی نێودەوڵەتی دەکاتەوە

ئاڤا نیوز

 

حکومەتی عێراق پلانی هەیە بۆ ساڵی داهاتوو سێ فڕۆکەخانەی دیکەی نێودەوڵەتی لە شارەکانی باشوور و باکووری وڵاتەکە بکاتەوە.

 

بۆچی گرنگە: بە تەواوکردنی ئەم سێ فڕۆکەخانەیە، عێراق دەبێتە خاوەنی نۆ فڕۆکەخانەی نێودەوڵەتی، زۆربوونی گەشتە ئاسمانییەکانیش کاریگەری لەسەر کارئاسانی بۆ هاتووچۆ و ئاڵۆگۆڕی بازرگانی دەبێت.

 

لێدوانی فەرمی: مەیسەم سافی، بەڕێوەبەری نووسینگەی ڕاگەیاندنی وەزارەتی گواستنەوە بەڕۆژنامەی "سەباح"ـی ڕاگەیاند: کارکردن لە فڕۆکەخانە نێودەوڵەتییەکانی کەربەلای پیرۆز و ناسریە و مووسڵ لەلایەن کۆمپانیا ناوخۆیی و نێودەوڵەتییەکانەوە بەردەوامە.

 

زانیاریی زیاتر: پڕۆژەی فڕۆکەخانەی نێودەوڵەتیی کەربەلا بە یەکێک لە پڕۆژە گرنگەکان دادەنرێت بۆ بەهێزکردنی ژێرخانی فڕۆکەوانی وڵات، پێشبینی دەکرێت ئەم فڕۆکەخانەیە ساڵانە پێشوازیی لە شەش ملیۆن زیارەتکار بکات.

 

لەلایەکی دیکەوە: کارکردن لە فڕۆکەخانەی ناسریە و دیزاینی فڕۆکەخانەی مووسڵ بەردەوامە، هەرسێ فڕۆکەخانەکەش لە ساڵی داهاتوو دەکرێنەوە. مەیسەم سافی وا دەڵێت.