حەلبووسی سێ پێشنیاز دەخاتە بەردەم لایەنەکانی چوارچێوەی هەماهەنگی

ئاڤا نیوز 

 

لایەنەکانی چوارچێوەی هەماهەنگی کۆدەبنەوە، یەکێک لە تەوەری کۆبوونەوەکەیان پرسی هەڵبژاردنی سەرۆکی ئەنجوومەنی نوێنەرانی عێراق دەبێت. 

 

وێنە گەورەکە: زیاتر لە 280 ڕۆژە محەممەد حەلبووسی لە پۆستی سەرۆکی ئەنجوومەنی نوێنەرانی عێراق دوورخراوەتەوە و دووجار هەڵبژاردن بۆ پۆستەکە کراوە و نەگەیشتوونەتە ئەنجام.

 

لێدوانی فەرمی: حەلبووسی سێ پێشنیازی خستووەتە بەردەم لایەنەکانی چوارچێوەی هەماهەنگیی، بۆ هەڵبژاردنی سەرۆکی ئەنجوومەنی نوێنەران، لەدەرەوەی ئەو پێشنیازانە هیچ ڕێککەوتنێک ناکات.

شێروان دووبەردانی، ئەندامی ئەنجوومەنی نوێنەرانی عێراق وای بە ئاڤا نیوز گوت.

 

پێشنیازەکان چین؟ بەگوتەی ئەو ئەندامەی ئەنجوومەنی نوێنەرانی عێراق پێشنیازەکانی پێکهاتوون لە:- 

1. لە بەرامبەر پۆستی سەرۆکی ئەنجوومەنی نوێنەرانی عێراق، پۆستی دوو وەزارەت وەرگرن.

 

2. ئەو بەربژێرە هەڵبژێردرێت کە حەلبووسی پاڵپشتیی دەکات بۆ سەرۆکی ئەنجوومەنی نوێنەران.

 

3. بەتەمەنترین ئەندام سەرپەرشتی کۆبوونەوەکانی ئەنجوومەنی نوێنەران بکات، تاوەکو پێکهێنانی کابینەی نوێی حکومەت.

 

خاڵە ئەرێنییەکان: ڕۆژانی سێ و چواری تەمموزی 2024، سەرۆک بارزانی سەردانی بەغدای کرد، لایەنە سوننەکانی کۆکردەوە بڕیاری دا هاوبەش لەنێوان هەردوو لایەنی سووننە و چوارچێوەی هەماهەنگی پێکبهێنرێت بۆ یەکلاییکردنەوەی پۆستی سەرۆکی ئەنجوومەنی نوێنەران.

 

باکگراوند: رۆژی 14-11-2023، دادگەی باڵای فیدراڵیی عێراق لە بڕیارێکی 16 لاپەڕەیدا بەتۆمەتی "ساختەکاری، شێواندن و گۆڕین، شکاندنی سوێندی یاسایی" کۆتایی بە سەرۆکایەتیی محەممەد حەلبووسی، سەرۆکی ئەنجوومەنی نوێنەرانی عێراقی هێنا.