بە گوژمەی 37 ملیۆن دۆلار دوو پرۆژە لە زاخۆ جێبەجێ دەکرێن

ئاڤا نیوز

 

لە درێژەی کارەکانی کابینەی نۆیەم لە کەرتی گەشتوگوزاریی و بازرگانی،  بە گوژمەی 37 ملیۆن دۆلار بەردی بناغەی دوو پڕۆژەی گەورە لە ئیدارەی سەربەخۆی زاخۆ دادەنرێت.

 

وێنە گەورەکە: ئەمڕۆ 22-7-2024، بەردی بناغەی هەردوو پڕۆژەی ڤیا پارک و سیپان پارک لە زاخۆ دادەنرێت. 

 

لێدوانی فەرمی: جگەر خوێن تاھر، بەڕێوەبەری گشتیی وەبەرھێنانی زاخۆ، بە ئاڤا نیوزی ڕاگەیاند: ئەمڕۆ بە ئامادەبوونی سەرۆکی دەستەی وەبەرھێنان بەردی بناغەی هەردوو پڕۆژەکە دادەنرێت.

 

زانیاریی زیاتر: جگەرخوێن تاهیر ئەوەشی گوت، ڤیا پارکی زاخۆ پڕۆژەیەکی گەشتیاری و بازرگانییە، لەسەر ڕووبەری 21 دۆنم و بە گوژمەی 25 ملیۆن دۆلار دروست دەکرێت و ماوەی تەواوکردنی چوار ساڵە،  سیپان پارکیش پرۆژەیەکە لە ھۆتێلێک و 51 ڤیلای گەشتیاری، خواردنگە، کافتریا و شاری یاریی و چەند شوێنێکی دیکەی تێدایە کە 900 ڕۆژ ماوی تەواوکردنی پرۆژەکەیە.

 

بۆچی گرنگە؟ هەردوو پرۆژەکە نزیکە 600 هەلی کار دەرەخسێنن و هەنگاوێکی گرنگە بۆ بەرەوپێشچوونی زیاتری کەرتی گەشتیاری.