عێراق سوود لە ئەزمووونی دیجیتاڵی وەزارەتی پەروەردەی هەرێمی کوردستان وەردەگرێت

ئاڤا نیوز

 

بەمەبەستی سوود وەرگرتن لە ئەزموونی دیجیتاڵیی وەزارەتی پەروەردەی هەرێمی کوردستان، شاندێکی وەزارەتی پەروەردەی عێراقی فیدراڵ لەگەڵ وەزیری پەروەردەی هەرێمی کوردستان کۆبووەوە.

 

لێدوانی فەرمی: د. ئالان حەمەسەعید، وەزیری پەروەرەدەی حکومەتی هەرێمی کوردستان بە ئاڤا میدیای ڕاگەیاند، ئەمڕۆ پێنجشەممە 9-10-2025، شاندێک لە نووسینگەی وەزیری پەروەردەی عێراقی فیدراڵ و ڕێکخراوی یونسکۆ بۆ سوود وەرگرتن لە ئەزموونی بە دیجیتاڵکردنی کەرتی پەروەردە، بەتایبەتیش سیستمی (E-Parwarda) سەردانی وەزارەتی پەروەردەی هەرێمی کوردستانیان کرد.

 

وەزیری پەروەردە باس لەوەش دەکات، سەردانەکە بە ئامادەبوونی "هەماهەنگکاری کەرتی پەروەردە لە عێراق - ڕێکخراوی یونسکۆ" ئەنجام درا، تێیدا سیستمە دیجیتاڵییەکانی وەزارەتمان خرایە ڕوو ، هەروەها "بۆ هەماهەنگی ئەوان، ئامادەسازیی خۆمان خستە ڕوو".

 

ئەوەی پێویستە بیزانیت: سیستمی ئی-پەروەردە سیستمێکی ئەلیکترۆنییە و چەندین خزمەتگوازاریی لەخۆگرتووە وەک (ئی-وانە، وەرگێڕانی بڕوانامە، هەڵسەنگاندنی دەرەکیی قوتابخانەکان، گواستنەوەی قوتابیان)، کاروبارەکانی وەزارەتەکە لەڕێگەی ئەو خزمەتگوزارییە دیجتاڵییانە دەکرێت، هەر قوتابی و مامۆستا و فەرمانبەرێک بە وشەی بەکارهێنەر و تێپەڕی تایبەتی خۆی دەتوانێت سوود لەو خزمەتگوازییانە وەربگرێت.

 

باکگراوند: وەزارەتی پەروەردەی حکومەتی هەرێمی کوردستان لە ساڵی 2019ەوە کار بە سیستمی ئی-پەروەردە دەکات و داتای زیاتر لە دوو ملیۆن کەس لە مامۆستا و فەرمانبەر و قوتابییان بە تەواوی وردەکارییەوە لەو سیستمە تۆمار کراون.